ہم لوگ سیاست کرنے کے لئے ہی کرسی پر بیٹھے ہیں، سماجی خدمت کرنے کے لئے نہیں۔ مرکزی وزیر اننت کمار ہیگڈے کابیان
سرسی 11؍اکتوبر (ایس او نیوز) ضلع شمالی کینرا سے بی جے پی کے رکن پارلیمان اور مرکزی وزیر اننت کمار ہیگڈے نے ایک اور متنازعہ بیان دیتے ہوئے کہا ہے کہ ہم لوگ سیاست کرنے کے لئے ہی کرسیوں پربیٹھے ہیں۔ سماج سیو ا کرنے کے لئے ہم اس مقام پر نہیں آئے ہیں۔
سرسی میں منعقدہ بی جے پی کی ضلع مجلس عاملہ کی میٹنگ سے خطاب کرتے ہوئے اننت کمار ہیگڈے نے کہا کہ اگر کوئی پوچھتا ہے کہ تم لوگ سیاست کررہے ہوتو اس کا جواب یہی ہے کہ ہاں ہم لوگ سیاست کرنے کے لئے ہی ان کرسیوں پر بیٹھے ہیں۔ اسی کام کے لئے ہم ایم ایل اے اور ایم پی بنتے ہیں۔ سماج سیوا کرنے کے لئے ہم ان کرسیوں پر نہیں بیٹھے ہیں۔ سیاست چھوڑ کر اور کچھ کیا نہیں جاسکتا۔سیاست ہی کرنا ہے۔ اب اس کے بارے میں میڈیا والے جولکھنا چاہیں لکھیں۔ جو جیسا سوچتا ہے ویساہے عمل کرتا ہے۔