کاروار26؍مئی (ایس او نیوز)ضلع شمالی کینرا کے کاروار میں واقع کائیگا اٹامک پاور پلانٹ کے لئے خصوصی طور پر لے جانے والے ٹینکر سے کیمیکل خارج ہونے سے ماحول  آلودہ ہونے کی خبر موصول ہوئی ہے۔

ذرائع سے ملی اطلاع کے مطابق  سیال کی شکل میں بہنے والا یہ کیمیکل کالی ندی کے پاس واقع ڈیم کے  پانی میں شامل ہوگیا ہے، جس سے ایک طرف پینے کا پانی آلودہ ہوگیا اور سیکڑوں مچھلیاں ہلاک ہوگئیں تو دوسری طرف آس پاس میں موجود درخت تباہ ہوگئے ہیں۔کیمیکل خارج ہونے کی اطلاع ملنے پر فائر بریگیڈ کے عملے جائے وقوع پر پہنچ کر اس کے پھیلاؤ کو مزید بڑھنے سے روک دیا۔ چونکہ پانی میں کیمیکل شامل ہوچکا ہے اس لئے پانی کو لیباریٹری ٹیسٹ کے لئے بھیج دیا گیا ہے ۔ اس کے علاوہ بطور احتیاط کدرا کے پی سی کالونی، کدرا باز آبادکاری مرکز اور کدرا کے دیہاتوں میں دو دنوں کے لئے پانی کے استعمال پر پابندی لگادی گئی ہے۔

پتہ چلا ہے کہ اس ضمن میں کوئی شکایت درج نہیں کی گئی ہے ، البتہعوام اس بات پر تعجب کا اظہار کر رہے ہیں کہ کیمیکل کے اخراج کا اتنا بڑا واقعہ ہونے کے باجودمحکمہ ماحولیات یا محکمہ جنگلات کے افسران نے موقع پر آنے اور عوام کو راحت دلانے کا کوئی اقدام نہیں کیا۔یہاں تک کے کائیگا پلانٹ کے افسران نے بھی اس طرف کوئی توجہ نہیں دی۔عوام کو اب یہ خوف ستا رہا ہے کہ اگر خدانخواستہ کبھی اس اٹامک پلانٹ سے تابکاری والی شعاعوں(ریڈی ایشن) کا اخراج ہوگا تو بھی شاید افسران اسی طرح کی غفلت کا مظاہرہ کریں گے۔

علاوہ ازیں عوام کو اس بات سے بھی سخت پریشانی لاحق ہورہی ہے کہ شدید گرمی کے دنوں میں دو دنوں تک بغیر پانی کیسے گزارا ہوسکے گا۔ وہ یہ آس لگائے بیٹھے ہیں کہ متعلقہ محکمہ جات کے افسران شاید نیند سے جاگ پڑیں گے اور روزمرہ کے استعمال کے لئے عوام کو پینے لائق پانی فراہم کرنے کا بندوبست کریں گے۔