بھٹکل19/جون (ایس او نیوز) کار کی ٹنکی میں پٹرول کے بجائے پانی  بھرنے  کے الزام میں پولس نے  پیر کو ایک شخص کو گرفتار کرلیا ہے جس کی شناخت  فہمان (35) کی حیثیت سے کی گئی ہے۔ پولس نے ملزم کو گرفتار کرنے کے بعد عدالت میں پیش کیا ہے جہاں سے اُسے  جوڈیشیل کسٹڈی میں  کاروار جیل بھیج دیا گیا ہے۔

خیال رہے کہ گذشتہ مارچ کے مہینہ میں بھٹکل کے ایک گولڈ بیوپاری انصار چنا اپنی پوری فیملی کے ساتھ بنگلور کے سفر پر روانہ ہونے  کے دوران   شمس الدین سرکل کے قریب واقع پٹرول بنک سے اپنی نئی کار میں پٹرول بھرنے  کے لئے گیا تھا، مگر  پٹرول  اسٹیشن میں پٹرول کی جگہ اس کی کار میں پانی بھرا گیا،جس کے نتیجے میں نئی نویلی کار کا پورا انجن ناکارہ ہوگیا اور اُنہیں اپنا سفر بھی ملتوی کرنا پڑا ۔اس تعلق سے  انصار دامدا نے اُسی وقت  پولس تھانہ میں شکایت درج کرائی تھی۔ 

بھٹکل سرکل پولس انسپکٹر گنیش نے بتایا کہ پٹرول میں پانی مکس کرنے کے الزام میں  فہمان کو گرفتار کرکے اب کاروار جیل بھیج دیا گیا ہے۔ واقعے کے تعلق سے مزید چھان بین جاری ہے۔