نئی دہلی ،20؍نومبر(ایس او نیوز؍آئی این ایس انڈیا)وی وی پی اے ٹی معاملے میں سماعت کرتے ہوئے پیر کو سپریم کورٹ نے گجرات کی ایک علاقائی پارٹی کی درخواست مسترد کردی۔کورٹ نے کہا کہ کسی بھی الیکشن سے پہلے کسی درخواست پر حکم جاری نہیں کر سکتے ہے۔گجرات کی علاقائی پارٹی گجرات جن چیتنا فورم کے سربراہ نے سپریم کورٹ میں عرضی داخل کی۔پٹیشن میں قانون56(2)ڈی کو چیلنج کیا گیا ہے، جس نے ریٹرننگ افسر کو یہ اختیار دیا گیا ہے کہ وہ وی وی پی اے ٹی کی ووٹنگ کی گنتی کرے یانہ کرے۔درخواست گزار نے سپریم کورٹ میں کہا کہ اس اصول کو منسوخ کیا جائے کیونکہ 2013کے سپریم کورٹ کے حکم کے بعد وی وی پی اے ٹی کی پیپر ٹریل کی گنتی ضروری ہے۔وہیں الیکشن کمیشن کی جانب سے کہا گیا کہ قوانین کے مطابق شک ہونے پر کوئی بھی ووٹر ریٹرننگ افسر کو لکھ کر اپنے ووٹ کا ٹریل دیکھ سکتا ہے۔اس کے علاوہ کوئی بھی الیکشن عرضی داخل کرکے اسے چیلنج کر سکتے ہیں۔ایسے میں اس درخواست پر کوئی سماعت نہیں کی جانی چاہیے۔دراصل دو ہفتے پہلے سپریم کورٹ عرضی پر سماعت کے لیے تیار ہو گیا تھا۔کورٹ نے درخواست کی کاپی الیکشن کمیشن کو دینے کو کہا تھا۔