وجئے پور کے منگلولی شیڈ سے بازیاب وی وی پیاٹ کا تعلق وجئے پور سے نہیں؛ ڈپٹی کمشنر کا دعویٰ؛ پھر شیڈ میں وی وی پیاٹ کہاں سے آئے ؟ عوام کا سوال
وجئے پور،21؍ مئی(ایس او نیوز ) قومی شاہراہ نمبر 13؍ پرمنگلولی گاؤں سے قریب ایک جھونپڑی کے شیڈ میں 8؍وی وی پیاٹ مشینوں کے خالی باکس پائے گئے تھے ، جس پر ریاست بھر میں چرچا ہورہا تھا اور ای وی ایم کو لے کر سوالات اُٹھائے جارہے تھے، مگر ضلع کے ڈپٹی کمشنر ایس بی شٹنور نے اخباری بیان جاری کرتے ہوئے دعویٰ کیا ہے کہ ان وی وی پیاٹ مشینوں کا تعلق ضلع وجئے پور سے نہیں ہے اور نہ ہی ضلع وجئے پور میں ان باکسوں کو استعمال کرنے حالیہ اسمبلی الیکشن میں لایاگیا تھا۔
ڈپٹی کمشنر یس بی شٹنور نے وی وی پیاٹ مشینوں کے بے جا استعمال کی افواہوں کو مسترد کردیا اور12 مئی کو پولنگ کے دن ایک مخصوص اُمیدوار کو مدد کرنے کی کوشش کا جو الزام لگایا جارہا تھا، اُسے غلط اور بے بنیاد قرار دیا۔
انہو ں نے واضح طور پر بتایا کہ ضلع وجئے پور کے آٹھ اسمبلی حلقوں کے لئے الیکشن کمیشن آف انڈیا سے کل 2744؍ وی وی پیاٹ مشینیں موصول ہوئی تھیں مذکورہ واقعہ کے بعد پولنگ اور کاؤنٹنگ کا عمل پورا ہونے کے بعد یہاں جمع کئے گئے تمام 2744وی وی پیاٹ کی verification کی گئی ہے اور سبھی وی وی پیاٹ محفوظ اور ایک خفیہ مقام پر پولیس کے زبردست بندوست میں رکھے گئے ہیں جس کا انہوں نے خود جائزہ لیا ہے۔
شنٹور نے بتایاکہ کل شام شہر وجئے پور میں جب مذکورہ 8وی وی پیاٹ باکس ایک شیڈ میں پائے جانے کی سنسنی خبر جنگل کی آگ کی طرح پھیلی تو اسسٹنٹ کمشنر وجئے پور اور تحصیلدار بھاگیواڑ کو فوراً مینگولی روانہ کیاگیا جنہو ں نے متعلقہ شیڈ میں پھیلے پڑے تمام 8وی وی پیاٹ مشینوں کامعائنہ کیا تو انہوں نے دیکھا کہ تمام وی وی پیاٹ میں کوئی مشین نہیں ہے بلکہ یہ صرف خالی ڈبے ہیں جن پر کوئی unique ID نمبربھی نہیں تھا۔شٹنور نے مزید بتایا کہ مذکورہ حکام کی جانب سے مذکورہ وی وی پیاٹ کی تصدیق کرتے ہوئے ان کا وجئے پور ضلع میں کوئی تعلق نہیں ہونے کے اعلان کے باوجود منگولی گاؤں سے قریب متعلقہ شیڈ کے اطراف عوام خصوصی طور پر شہروجئے پور ، ببلیشور اور بسون بھاگیواڑی کے انتخابی اُمیدواروں کے حامیوں کی بھیڑ جمع ہوئی جنہو ں نے بتدریج دعویٰ کیا کہ پولنگ کے بغیر ان کے حلقوں میں و ی پیاٹ کا ردوبدل کرکے ان کی جگہ کاؤنٹنگ کے وقت دوسرے وی وی پیاٹ جمع کئے گئے ہیں اور پہلے کے وی وی پیاٹ قومی شاہراہ نمبر 13؍ پر پھینک دئے گئے ہیں۔
ببلیشور اسمبلی حلقہ کے بی جے پی امیدوار وجو گوڈا نے بتایا کہ کاؤنٹنگ کے دن ہی انہوں نے متعلقہ حکام کو اس بات سے آگاہ کیا تھاکہ کُل 21 ای وی ایم مشین اور وی وی پیاٹ کو بدل دیا گیا ہے۔ اسی طرح بسون بھاگیواڑی اسمبلی حلقہ کے جے ڈی ایس امیدوار کی بیوی نے کل ساری رات اپنے حامیوں کے ساتھ قومی شاہراہ نمبر 13؍پر دھرنا دیتے ہوئے ضلعی انتظامیہ پر الزام عائد کیا کہ بسون بھاگیواڑی اسمبلی حلقہ سے تعلق رکھنے والے ان وی وی پیاٹ تبدیل کرنے کے سبب جے ڈی ایس امیدوار کوشکست ہوئی ہے۔ شہر وجئے پور اسمبلی حلقہ کے اُمیدوار حمید مشرف نے مذکورہ وی وی پیاٹ کی اس قدر لاپروائی سے سڑک کے کنارے پائے جانے پر اس واقعے کی سی بی آئی کے ذریعہ تحقیقات کامطالبہ کیا ہے۔ بتایا جارہا ہے کہ مذکورہ واقعہ کی تحقیقات کو بند کردیا گیا ہے۔ تاہم یہ سوال پیدا ہوتا ہے کہ اگر وجے پور کے وی وی پیاٹ محفوظ ہیں تو پھر یہاں کے شیڈ میں وی وی پیاٹ کہاں سے آئے ؟
