فہرست رائے دہندگان پر نظر ثانی کا عمل خاموشی سے جاری
بنگلورو،27؍اگست(ایس او نیوز) الیکشن کمیشن آف انڈیا کی طرف سے فہرست رائے دہندگان پر نظر ثانی کا سلسلہ خاموشی سے جاری ہے۔ 15 جولائی 2018 سے شروع ہوا یہ سلسلہ 20 نومبر 2018 کو مکمل ہوگا۔
الیکشن کمیشن کی طرف سے جاری احکامات کے مطابق 15جولائی سے 10اگست تک بوتھ لیول افسروں کو ہر پولنگ بوتھ کی حدود میں آنے والے گھروں کا معائنہ کرنا تھا، اس کے بعد 27 اگست سے 15ستمبر تک الیکشن کمیشن کی طرف سے تمام پولنگ اسٹیشنوں کی عمارتوں کا جائزہ لیا جائے گا اور 10 اکتوبر سے فہرست رائے دہندگان پر نظر ثانی کا سلسلہ جاری رہے گا۔
یہ فہرست شائع ہونے کے بعد اس مسودے پر اعتراضات کا موقع 20نومبر تک دیا جائے گا اور 20دسمبر کو تمام اعتراضات سے نپٹنے کے بعد 3 جنوری 2019 کو فہرست رائے دہندگان کو قطعیت دے دی جائے گی4؍ جنوری 2019 قطعی فہرست رائے دہندگان منظر عام پر لائی جائے گی۔اس فہرست میں ان نوجوانوں کے نام شامل کئے جائیں گے، جن کی عمر یکم جنوری 2019 تک 18 سال کی ہوگئی ہو۔
مرکزی الیکشن کمیشن نے تمام ریاستی الیکشن کمشنروں کو ہدایت جاری کی ہے کہ اس پروگرام کے مطابق فہرست رائے دہندگان پر نظر ثانی کے عمل کو آگے بڑھایا جائے۔
