کاروار: انتخابات کو خوش اسلوبی کے ساتھ انجام دینے کے لئے ’ووٹرس گائیڈ‘ تقسیم کی جائے گی۔ اُتر کنڑا ڈپٹی کمشنر کا بیان
کاروار 12؍اپریل (ایس او نیوز)ووٹرس کی رہنمائی اور سہولت کو نظر میں رکھتے ہوئے ضلع انتظامیہ کی طرف سے ’ووٹرس گائیڈ‘ نامی کتابچہ شائع کرکے عوام میں تقسیم کیا جائے گا۔اس بات کی اطلاع ضلع اُترکنڑا کے ڈپٹی کمشنر ایس ایس نکول نے دی ہے۔
کاروار آکاش وانی ایف ایم ریڈیو پر ایک انٹرویو کے دوران ڈی سی نکول نے ضلع میں انتخابات کی تیاریوں اور ووٹرس کی سہولت کو نظر میں رکھتے ہوئے کیے گئے اقدامات کی تفصیلات سے عوام کو آگاہ کیا ۔جس میں ووٹرس میں بیداری لانے کے لئے ریالی نکالنا،موٹربائک ریالی، ملینئم ووٹرس کے لئے اسکوبا ڈائیونگ کرتے ہوئے ووٹر شناختی کارڈ تقسیم کرنا،معذوروں کے لئے پیراموٹرگلائیڈنگ کا موقع فراہم کرتے ہوئے ان کے اندر ووٹنگ کے تعلق سے دلچسپی اور بیداری پیداکرناجیسے پروگرام شامل ہیں۔
ڈی سی نے بتایا کہ پولنگ بوتھ میں معذورین اور عمررسیدہ افرادکے لئے وھیل چیئرز اور ریامپس کا بھی بندوبست کیا جائے گا۔اس کے علاوہ ہر بوتھ میں حاملہ عورتوں ، معذورین اور عمر رسیدہ افراد کو قطار میں لگے بغیر سیدھے اندر جاکر پولنگ کرنے کی اجازت ہوگی۔
ڈپٹی کمشنر نے انتخابی امیدواروں کے اخراجات پر پابندی کے تعلق سے بتایا کہ ہر امیدوار کو پورے الیکشن پر 28لاکھ روپے تک خرچ کرنے کی حد مقرر ہے۔ اس کے علاوہ اخباروں میں رقم دے کر نیوز چھپوانے(پیڈ نیوز) پر نگرانی کے لئے ایک میڈیا مانیٹئرنگ اورسیاسی پارٹیوں کی اشتہارات کے لئے میڈیا سرٹی فکیشن کمیٹی تشکیل دی گئی ہے۔
ڈی سی نکول نے بتایا کہ گزشتہ انتخابات میں ضلع شمالی کینرا میں 73فیصدی پولنگ ہوئی تھی، اس بار عوام کو چاہیے کہ یہاں 100فیصدی پولنگ کا ریکارڈ قائم کریں، جس کا نشانہ ضلع انتظامیہ نے طے کیا ہے اور ا س کے لئے تمام ضروری اقدامات کیے جارہے ہیں۔