بنگلورو،24؍نومبر(ایس او نیو ز) فہرست رائے دہندگان میں ناموں کے اندراج کا سلسلہ آج سے ریاست بھر میں زور پکڑ چکا ہے۔ ووٹر لسٹوں میں جن افراد کا نام نہیں ہے ان کے ناموں کی شمولیت کے لئے آج سے تین دنوں تک ریاست کے ہر پولنگ بوتھ میں ناموں کے اندراج کا کیمپ لگا ہے۔ الیکشن کمیشن کی طرف سے لوک سبھا انتخابات سے قبل ووٹر لسٹوں کو اپ ڈیٹ کرنے کی مہم کے حصے کے طور پر یہ کیمپ لگائے جارہے ہیں۔ وہ نوجوان جن کی عمر یکم جنوری 2019 کو 18 سال کی ہوجائے گی وہ فہرست رائے دہندگان میں اپنا نام درج کرواسکتے ہیں۔ فہرست رائے دہندگان میں نام درج کروانے کے لئے اپنی رہائش کے متعلق کوئی دستاویز ، دو تصاویر کے ساتھ اپنے قریبی پولنگ بوتھ پہنچ کر فارم 6بھرتی کرکے اپنا نام درج کروایا جاسکتا ہے۔ 23,24, اور 25نومبر کو روزانہ صبح دس سے شام پانچ بجے تک ہر پولنگ بوتھ میں ناموں کے اندراج کی خصوصی مہم جاری رہے گی۔ اس کے لئے الیکشن کمیشن کی ٹول فری نمبر 1950 پر کال کر کے بھی تفصیلات حاصل کی جاسکتی ہیں۔ بی بی ایم پی کمشنر منجوناتھ پرساد نے رائے دہندگان کو آواز دی ہے کہ وہ اس مہم کا فائدہ اٹھائیں اور فہرست رائے دہندگان میں اپنے نام درج کروائیں۔