بھٹکل 26؍مئی (ایس او نیوز) روٹری کلب بھٹکل کی طرف سے جاری پریس ریلیز کے مطابق خواتین کو مختلف فنون کی تربیت دینے اور انہیں باوقار زندگی گزارنے کے قابل بنانے کی نیت سے ایک ووکیشنل ٹریننگ سنٹر کا قیام عمل میں لایا جارہاہے، جس کا افتتاح 29مئی کو صبح 10بجے نیوا نگلش ہائی اسکول میں ہوگا۔

اس فنی تربیتی مرکزکا قیام روٹری کلب بھٹکل اور بھٹکل ایجوکیشن ٹرسٹ کے اشتراک سے ہوا ہے، جس کامقصد مضافاتی علاقوں میں رہنے والی خواتین کو اپنے پیروں پر کھڑا ہونے کے لئے فنی تربیت فراہم کرنا ہے۔ اس منصوبے کے لئے روٹری فاؤنڈیشن کے گلوبل گرانٹ پروگرام کے تحت امداد دی گئی ہے۔ ا س کے علاوہ ROTARY CLUB OF SALINAS SANTA LUCIA , CALIFORNIA, USA. کی طرف سے بھی مالی تعاون ملا ہے۔

اس تربیتی مرکز کا افتتاح ایم ایل اے منکال ویدئیا اورروٹری ڈسٹرکٹ گورنر ڈاکٹر ونئے کیمار پائی رائیکرکے ہاتھوں عمل میں آئے گا۔ابتدا میں اس سنٹر کے زیر سایہ کمپیوٹر کی تعلیم،ٹیلرنگ اینڈ ڈریس میکنگ،فوڈ پروسیسنگ، بیکری کی اشیاء وغیرہ کی تربیت دی جائے گی۔اس کے علاوہ آئندہ یہاں پر سپاری کے پتوں سے پلیٹس اور کپ وغیر ہ بنانے اور مصنوعی زیورات کی تیاری کے سلسلے میں بھی تربیت دینے کا منصوبہ زیر غور ہے۔