بھٹکل 20؍اگست (ایس او نیوز) ویژن انڈیا مشن فاؤنڈیشن کے ذریعے ہائی اسکو ل طلبہ کے لئے جو تحریری مقابلہ منعقد کیاگیا تھااس میں اول دوم اور سوم مقام پانے والے طلبہ کو جشن آزادی کے موقع پرمنکولی میں واقع فاؤنڈیشن کے دفتر میں منعقدہ پروگرام کے دوران انعامات تقسیم کیے گئے۔

اس تحریری مقابلے میں انجمن گرلز ہائی اسکول کی طالبہ حاجرہ عائشہ اول انعام حاصل کرنے میں کامیاب رہی، دوم انعام بینا وئیدیا ہائی اسکول کی طالبہ درشنی وائی چندرگیری اور سوم انعام نیو شمس اسکول کی طالبہ مازیہ مقبول نے حاصل کیا۔تقسیم انعامات کے پروگرام میں بھٹکل تحصیلدار وی این باڈکر نے مہمان خصوصی کی حیثیت سے شرکت کی۔اس موقع پرانہوں نے کہا کہ آج کل طلبہ کے لئے پڑھائی کے علاوہ دیگر مقابلوں میں حصہ لینے اور آگے بڑھنے کے بہت سارے مواقع ہیں جبکہ ماضی میں ایسی سہولتیں بہت کم ہوا کرتی تھیں۔ انجمن حامئ مسلمین کے ایڈیشنل سکریٹری جناب اسحاق شاہبندری، سماجی خدمت گارجناب نذیر قاسمجی اور بھٹکل سٹی جے سی آئی کے صدر جناب عبدالجباربھی مہمانان خصوصی کے طور پر پروگرام میں شریک رہے۔اس پروگرام کی صدارت ویژن انڈیا مشن فاؤنڈیشن کے صدر جناب محمد فاروق شیخ نے کی۔

اس موقع پر سی اے کاامتحان پاس کرنے والی دھن شری رویندرا پربھو اور انجینئرنگ میں ۶ گولڈ میڈل حاصل کرنے والے عبدالباعث کاڈلی کی تہنیت کی گئی۔ جناب نذیر احمد شیخ نے استقبال کیا۔جناب شوکت خطیب نے مہمانان کا تعارف پیش کیا۔ جناب امجد علی شیخ نے رپورٹ پیش کی۔ جناب ڈاکٹر نسیم خان کے شکریہ او رمولوی محمد ابوذر ندوی کی دعا کے ساتھ جلسہ اختتام پزیر ہوا۔