ہسی نے کہا کپتانی کے محاذ پر کوہلی میں نظر آتا ہے پونٹنگ والا انداز
میلبورن13اگست(ایس اونیوز؍آئی این ایس انڈیا) ٹیم انڈیا کے کپتان وراٹ کوہلی جس طرح سے سیریز پر سیریز جیت درج کر رہے ہیں اس لحاظ سے انہوں نے اپنے آپ کو نئی صدی کے منفرد لیڈر کے طور پر پیش کیا ہے۔ حال ہی میں ایک انگریزی اخبار سے بات چیت کے دوران آسٹریلیا کے سابق کرکٹر مائیک ہسی نے وراٹ کوہلی کی کپتانی کاموازنہ رکی پونٹنگ کی کپتانی سے کیااور ان کے کپتانی کے انداز کی تعریف کی۔ہسی نے دھونی کے ریٹائرمنٹ کے بارے میں بھی بات چیت کی۔
ہسی نے کہا کہ میں نے ہمیشہ کوہلی کی کپتانی کا لطف اٹھایا ہے، ان میں میچ جیتنے کی بھوک نظر آتی ہے اور میں وراٹ میں رکی پونٹنگ کی کپتانی کی مماثلت دیکھ سکتا ہوں۔ پونٹنگ ہمیشہ کامیابی کے لئے بھوکے لگتے تھے اور ہمیشہ اپنی ٹیم کو اس کے آگے کی طرف دھکیلتے تھے۔ ایم ایس دھونی بہترین کپتان تھے اور وراٹ کے لئے دھونی کی جگہ بھر پانا چیلنج ہوگا لیکن وراٹ کو لے کر اچھی بات یہ ہے کہ وہ دھونی کے طریقوں کا استعمال نہیں کرنا چاہتے۔
ہسی نے کہا کوہلی نے اپنے انداز میں ٹیم انڈیا کی قیادت کی ہے، وہ اپنی شخصیت کو لے کر ہمیشہ سے سچے ہیں۔ گزشتہ کچھ سالوں کے دوران ٹیم انڈیا تبدیلی کے دور سے گزر رہی تھی لیکن اب ٹیم انڈیا بہت متوازن ہے۔ یہ ہندوستانی کرکٹ کے لئے بہترین وقت ہے، کھلاڑیوں کو اپنے کپتان پر انحصار ہے اور ہر کسی کا نظریہ ایک ہے۔ ظاہری طور پر آنے والے وقت میں چیلنجز آئیں گے۔ اس دوران کپتان ہی نہیں بلکہ کھلاڑیوں کابھی امتحان ہوگا۔
ٹیم انڈیا کے سابق کپتان مہندر سنگھ دھونی کے 2019 ورلڈ کپ تک کھیلنے کے امکانات کے بارے میں بات چیت کرتے ہوئے ہسی نے کہاکہ ایم ایس اپنی شرائط پر ریٹائرمنٹ لینے یا نہ لینے کے قابل ہیں، اگر انہیں لگتا ہے کہ انہیں 2019 ورلڈ کپ کھیلنا ہے تو ان پر کون شک کر سکتا ہے، وہ بہت ہی شائستہ اور ایماندار شخص ہیں۔اگر وہ سوچتے ہیں کہ وہ سال 2019 میں ہندوستانی ٹیم کی کامیابی میں اہم کردار ادا نہیں کر سکتے تو مجھے نہیں لگتا کہ وہ وہاں جائیں گے، 36 سال کی عمر میں بھی وہ میرے حساب سے سب سے زیادہ فٹ کھلاڑی ہیں، وہ اپنا کھیل جانتے ہیں اور اپنے جسم کا عمدہ خیال رکھ رہے ہیں، لہذا وہ جانتے ہیں کہ کب الوداع کہنا ہے۔