کوچ انیل کمبلے کے ساتھ کوئی تنازعہ نہیں، لوگ قیاس بازی بند کریں،پاکستان کے ساتھ ہم اپنا فطری کھیل کھیلیں گے :وراٹ کوہلی
نئی دہلی،3؍جون(ایس او نیوز؍آئی این ایس انڈیا)میچ سے پہلے رد عمل ظاہر کرتے ہوئے وراٹ نے کہا کہ ہماری توجہ صرف کھیل پر ہے۔صحافیوں کی طرف کوچ انیل کمبلے اور ان کے درمیان تنازعہ ہونے کے سلسلے میں سوال پر وراٹ نے کہا کہ یہ صرف من گڑھت باتیں ہیں،میرے اور کوچ انیل کمبلے کے درمیان کوئی تنازعہ نہیں ہے،ہمارے بارے میں بہت ہی باتیں لکھی جا رہی ہیں لیکن سمجھ میں نہیں آ رہا ہے کہ لوگ ایسا کیوں کر رہے ہیں۔میڈیا کو آڑے ہاتھوں لیتے ہوئے وراٹ نے کہا کہ رائے اور اختلاف کا دور چلتا ہے،اہمیت عام سی بات ہے،ہندوستان میں لوگ اپنے سے زیادہ سوچ لیتے ہیں،میڈیا کچھ بھی لکھتا ہے لیکن ذمہ داری قبول نہیں کرتا۔گزشتہ ایک سال تک کمبلے کے ساتھ کھیلنے کے تجربے کے بارے میں انہوں نے کہا کہ یہ ان کے ساتھ کھیلنے کا اچھا تجربہ رہا۔کمبلے کے ساتھ تنازعہ پر انہوں نے کہا کہ مجھے جس چیز کا علم نہیں ہوتا تو میں کوئی تبصرہ نہیں کرتا،ہمارے یہاں لوگ اپنے آپ قیاس بازی لگاتے ہیں،اگر آپ کل کچھ لکھتے ہیں اور اگر وہ غلط ہو جاتا ہے تو پھر اسے قبول کرنے کا بھی جگر ہونا چاہئے،ہمارے یہاں غلطی ہو جانے پر کوئی غلطی نہیں مانتا،اگر میں غلط ہوتا ہوں تو اسے قبول کرتا ہوں،زندگی کے ہرمعاملے میں آپ کو ہر جگہ اتفاق نہیں ہو سکتا،یہ تو عام انسانی فطرت ہے۔
پاکستان کے ساتھ بڑے میچ کے سلسلے میں کپتان کوہلی نے کہا کہ ہم اپنا فطری کھیل کھیلیں گے،ہمیں اس سے کوئی فرق نہیں پڑتا کہ ہم کس کے خلاف کھیل رہے ہیں۔یہ پوچھے جانے پر کپتان کے طور پر کل کے بڑے میچ کو کس طرح نمٹیں گے ؟تو وراٹ نے کہا کہ میں اس کے بارے میں زیادہ نہیں سوچتا۔کپتان ہونے کے بارے میں میں نے کچھ زیادہ نہیں سوچتا،میری بیٹنگ پہلے کی طرح ہے،میں دباؤ میں آنے کے بجائے اپنے مضبوط شعبوں پر توجہ مرکوز کر رہا ہوں،میرے لئے چاہے عام میچ ہو یا بڑے ٹورنامنٹ کا میچ، سب برابر ہے کیونکہ کرکٹ میں ہر کھیل اہم ہوتا ہے۔پاکستان کے نئے کھلاڑیوں کے بارے میں انہوں نے کہا کہ وہ پریشانی میں ڈال سکتے ہیں لیکن ہم انہیں ہلکے میں نہیں لیں گے،ہم ٹیم کے طورپر اس بات پر زیادہ توجہ دے رہے ہیں کہ ہم کیا کر سکتے ہیں۔