ہوناور کی صورت حال معمول پر :واٹس اپ، فیس بک وغیرہ پر کڑی نگاہ : ڈی سی نکول کی شہریوں اور لیڈران سے میٹنگ
کاروار:10/ دسمبر(ایس اؤنیوز)گذشتہ چار دنوں سے فسادات سے متاثرہ شہر ہوناور میں حالات بہتر ہورہے ہیں اور پیر سے شہر معمول پر لوٹ رہے ہیں۔ اس بات کی اطلاع اترکنڑا ضلع ڈپٹی کمشنر ایس ایس نکول نے دی ۔
اتوار کو ضلع ایس پی اور تحصیلدار کی موجودگی میں ہوناور کے مختلف اداروں اور تنظیموں کے قریب 50سے زائد لیڈران کے ساتھ ڈی سی ایس ایس نکول نے گفتگو کرتے ہوئے شہر کے حالات کا تجزیہ کیا۔اور کہاکہ پیر سے شہر کی تمام دکانیں کھلیں گی ، اسکول اورکالجس بھی حسب معمول جاری رہیں گے۔ پٹرول بنک وغیرہ بھی کھولے جائیں گے اور حالات پوری طرح معمول پر لوٹیں گے۔ ڈی سی نے بتایاکہ پیشگی اقدامات کے طورپر ایس پی صاحب نے شہر میں پولس کا سخت بندوبست رکھتے ہوئے چوکنا رہنے کی ہدایات جاری کی ہیں۔
متنازعہ جگہ کے متعلق میٹنگ میں موجود لیڈران کو بتایا کہ متنازعہ جگہ کا سروے کیا جائےگا،اس سلسلے میں کسی بھی طرح کی افواہوں پر دھیان نہ دینے اور حالات کو پرامن اور خوشگوار بنانے میں مکمل تعاون کرنےکی انہوں نے عوام سے اپیل کی۔
ڈی سی نے مزید بتایا کہ ہنگامہ کی وجوہات کے متعلق منی پال اسپتال اور دیگر ذرائع سے جانکاری حاصل کی گئی ہے اور معاملے کو لے کر جانچ تیز ی کے ساتھ جاری ہے۔
ڈی سی نے سوشیل میڈیا واٹس اپ، فیس بک پر جاری اشتعال انگیزی کے خلاف سخت کارروائی کی بات کرتے ہوئے کہاکہ سوشیل میڈیاپر جھوٹی افواہوں کو پھیلاتے ہوئے اشتعال انگیزی کرنے والوں کے خلاف کڑی نگاہ رکھی جارہی ہے۔ ابھی تک ایسے اشتعال انگیز پوسٹ پھیلانے والوں کے اسکرین شاٹ لے کر ان کے متعلق جانکاری حاصل کی گئی ہے اور اسکرین شاٹ کو بھی جمع کرلیا گیا ہے ۔ انہوں نے انتباہ دیا کہ خاطیوں کے خلاف آئی پی سی اور آئی ٹی قانون کےمطابق سخت کارروائی کی جائے گی۔
اس موقع پر فیس بک، ٹیوٹر ، واٹس اپ کے گروپوں میں اشتعال انگیز پوسٹ نظر آئیں تو ان پیغامات کے اسکرین شاٹ لے کر محکمہ پولس کے کنٹرول روم موبائیل نمبر 94808052010اور ڈی سی دفتر واٹس اپ کمپلنٹ موبائیل نمبر 9483511015پر ارسال کرنے کی بھی انہوں نے اپیل کی ہے۔
میٹنگ میں ہوناور معاملے کو معمول پر لانے اور حالات کو قابومیں رکھنے کے لئےمقامی پی ایس آئی آنند مورتی کی خدمات کا کھل کر اعتراف کرتے ہوئے ان کی ستائش کی گئی ۔ آنند مورتی کے متعلق کہاگیا کہ انہوں نے اپنے فرائض کو بحسن وخوبی انجام دیاہےاور حالات کو مزید بگڑنے نہ دینے میں ان کاکردار اہم ہونے پر لیڈران نے ستائش کی ہے۔ گذشتہ چار دنوں سے شہر میں امن کو بحال کرنے میں شہریوں سے ان کی جانب سے کی گئی اپیل اور کئے گئے اقدامات کی سراہنا کی ہیں۔