اگر نظم ونسق برقرار نہیں تو گجرات میں صدر راج نافذہو،مودی یوپی سے الیکشن جیتتے ہیں،لیکن گجرا ت میں تحفظ دینے میں ناکام
نئی دہلی ،10؍ اکتوبر (ایس او نیوز؍آئی این ایس انڈیا) گجرات میں شمالی ہند کے لوگوں پر حملے کے واقعات کی مذمت کرتے ہوئے کانگریس کے سینئر لیڈر شکتی سنگھ گوہل نے بدھ کو کہا کہ اگر ریاستی حکومت قانون کا نظام برقرار رکھنے کے قابل نہیں ہے تو وہاں صدر راج نافذ کیا جانا چاہئے۔انہوں نے کانگریس لیڈر الپیش ٹھاکر پر تشدد بھڑکانے کے الزامات کو مسترد کیا اور وجے روپانی حکومت کو چیلنج کیا کہ اگر ٹھاکر تشدد کے لئے ذمہ دار ہیں تو ان کو گرفتار کریں۔گوہل نے کہا کہ میرے لیے اورہر گجراتی کے لیے شرم کی بات ہے کہ بی جے پی نے سوچی سمجھی سازش کے تحت اتر پردیش اور بہار کے لوگوں کے خلاف مہم چلائی۔میرے پاس کچھ ثبوت ہیں کہ فیس بک اور واٹس اپ پر بی جے پی کے لوگ یہ مہم چلا رہے ہیں۔انہوں نے کہاکہ حکومت کے پاس کوئی کام کی بات نہیں ہے۔اپنی ناکامیوں کو چھپانے کے لئے یہ سوچی سمجھی سازش رچی گئی۔انہوں نے کہاکہ اگر وہاں کی حکومت نظم ونسق برقرار نہیں رکھ سکتی تو اسے برطرف کر کے صدر راج نافذ کیا جائے۔گوہل نے کہاکہ وزیر اعظم اتر پردیش سے انتخابات جیتتے ہیں اور انہی لوگوں کی گجرات میں کوئی حفاظت نہیں ہے۔ان کا جواب دینا چاہئے۔کانگریس کے بہار انچارج نے کہاکہ بہار اور گجرات کا بہت پرانا رشتہ ہے۔گجرات گاندھی جی کی جائے پیدائش ہے اور بہار ان کی کرم بھومی رہی ہے۔ دونوں ریاستوں کا رشتہ بہت گہرا ہے۔ الپیش ٹھاکر پر لگ رہے الزامات کو مسترد کرتے ہوئے انہوں نے کہاکہ ٹھاکر نے خود ویڈیو پوسٹ کر کے لوگوں سے اپیل کی ہے کہ امن کو برقرار رکھیں۔اگر وہ ذمہ دار ہیں تو ان پر ایف آئی آر درج کر و اور جیل میں ڈالو۔لیکن یہ حکومت ایسا نہیں کرے گی کیونکہ اس کو صرف سیاست کرنی ہے۔