وجئے شنکر نے بی جے پی کے سوٹ کیس کلچر کو بے نقاب کیا ہے: سی ایم ابراہیم
بنگلورو،7؍اکتوبر(ایس او نیوز) سابق ریاستی وزیر اور بی جے پی کے سرکردہ لیڈر سی ایس وجئے شنکر نے الزام لگایا کہ بی جے پی میں رشوت خوری اور سوٹ کیس کی سیاست کا بازار کافی گرم ہے۔اس پارٹی میں صرف جھوٹ ہی چلتا ہے۔ وجئے شنکر کے اس بیان کا سینئر کانگریس لیڈر اور رکن کونسل سی ایم ابراہیم نے خیر مقدم کیا اور کہاکہ وجئے شنکر کی حقیقت بیانی بی جے پی کی موجودہ صورتحال کا آئینہ ہے۔ وزیر اعلیٰ کی ہوم آفس کاویری میں اخباری نمائندوں سے بات چیت کرتے ہوئے انہوں نے کہاکہ بی جے پی میں جب سے مودی اقتدار پر آئے ہیں پارٹی کے لیڈران کچھ بھی کہنے سے خوفزدہ ہیں ۔تاہم وجئے شنکر نے کافی جرأت دکھاتے ہوئے اس سچائی کو بے نقاب کیا ہے۔ انہوں نے کہا کہ سی ایچ وجئے شنکر کا بی جے پی کے کچھ دیانتدار لیڈروں میں شمار ہوتاہے۔ انہوں نے کافی ذمہ داری کے ساتھ جو بیان دیا ہے اس سے ظاہر ہوتاہے کہ بی جے پی ریاست میں کس حد تک گر چکی ہے۔ کانگریس کے خلاف چارج شیٹ منظر عام پر لانے ریاستی بی جے پی صدر یڈیورپا کے اعلان پر طنز کرتے ہوئے سی ایم ابراہیم نے کہاکہ وجئے شنکر نے پارٹی کے خلاف جو چارج شیٹ منظر عام پر لائی ہے یڈیورپا پہلے اس کا جواب دیں۔ انہوں نے کہاکہ وزیر اعظم مودی کی طرف سے بار بار من کی بات کی وجہ سے ملک کے عوام اکتا چکے ہیں ، اب وہ چاہتے ہیں کہ کام کی بات کی جائے۔ ریاست میں سدرامیا حکومت نے ہمیشہ کام کی باتیں کی ہے ، من کی بات کرکے عوام کو گمراہ کرنا کانگریس لیڈروں کو نہیں آتا۔ معروف فلم اداکار پرکاش رائے کی طرف سے گوری لنکیش معاملہ میں وزیر اعظم مودی پر کی گئی نکتہ چینی کو بجا قرار دیتے ہوئے اس کے خلاف بعض بی جے پی کارندوں کی طرف سے عدالتوں میں مقدمات پر تبصرہ کرتے ہوئے ابراہیم نے کہاکہ اس سے ظاہر ہوتا ہے کہ بی جے پی سچ برداشت نہیں کرتی۔ انہوں نے کیرلا میں بی جے پی کی ریلی کو ادھورا چھوڑ کر امیت شا کے دہلی لوٹ جانے پر تبصرہ کرتے ہوئے کہاکہ ریلی میں جب لوگ ہی نہیں تھے تو امیت شا وہاں رہ کر کیا کرتے۔ امیت شا اور یوگی نے خود پہنچ کر کیرلا میں بی جے پی کی کسمپرسی کا نظارہ کیا ہے۔