وزیر کھیل گوئل نے ہندوستانی خواتین کرکٹ ٹیم کو نوازا
نئی دہلی،27جولائی(آئی این ایس انڈیا): وزیر کھیل وجے گوئل نے جمعرات کو ہندوستانی خواتین کرکٹ ٹیم کو آئی سی سی خواتین ورلڈ کپ میں ان کی شاندار کارکردگی کے لئے نوازا۔گوئل نے ٹیم کو مبارکباد دیتے ہوئے کہا کہ متالی راج کی قیادت والی ہندوستانی ٹیم بھلے ہی میزبان انگلینڈ کے خلاف خطابی مقابلے میں نو رن سے ہار گئی ہو، لیکن انہوں نے پورے ملک کے دلوں کو جیت لیا ہے۔انہوں نے کہا کہ ہماری خواتین کرکٹ ٹیم نے بہت اچھا کیا ہے کہ ان کے لئے کسی بھی قسم کی تعریف کم ہوگی۔ورلڈ کپ میں رنر اپ ہونے کے باوجود مجھے لگتا ہے کہ خواتین ٹیم نے فائنل جیت لیا ہے کیونکہ انہوں نے پورے ملک کے دلوں کو جیت لیا ہے اور پورے ملک کے دلوں کو جیتنا اتنی بڑی بات ہے کہ وزیر اعظم نریندر مودی نے بھی کہا ہے کہ ہمیں آپ پر فخر ہے اور یہی وجہ ہے کہ وزیر اعظم مودی کہتے ہیں کہ اگر آپ کھیلیں گے، آپ بڑھیں گے۔
وزیر کھیل نے مزید کہا کہ 50اوور کے ٹورنامنٹ میں ان کی کارکردگی کے بعد ملک بھر کے لوگ خواتین کرکٹروں کے بارے میں مزید آگاہ ہو گئے ہیں۔ورلڈ کپ سے پہلے خواتین کی ٹیم کے بارے میں لوگوں کو زیادہ معلومات نہیں تھی، لیکن اب ورلڈ کپ کے خطابی مقابلے کے بعد لوگ تمام خواتین کھلاڑیوں کے بارے میں جانتے ہیں،تو میں متالی راج اور ان کی پوری ٹیم کو مبارکباد دینا چاہتا ہوں،میں ہندوستانی کرکٹ کنٹرول بورڈ (بی سی سی آئی)کو بھی مبارک باد دینا چاہتا ہوں،ساتھ ہی کوچ، ٹیم منیجر اور معاون عملے کو بھی مبارک باد دینا چاہتا ہوں۔
غور طلب ہے کہ انگلینڈ نے آئی سی سی خواتین ورلڈ کپ کے ایک دلچسپ مقابلے میں ہندوستان کو 9رنز سے شکست دے کر ورلڈ کپ پر قبضہ کیا۔انگلینڈ کی طرف سے انا شرابولل نے شاندار بولنگ کرتے ہوئے 46رنز دے کر 6وکٹ لئے۔229رنز کے ہدف کا تعاقب کر رہی ہندوستانی ٹیم ایک وقت تین وکٹ پر 191رنز بنا کر اچھی حالت میں تھی۔آخری 12گیندوں پر ٹیم کو جیت کے لئے 11رنز درکار تھے، لیکن ہندوستانی ٹیم 219رنز پر آؤٹ ہو گئی۔