ہنوئی،13اکتوبر(ایس او نیوز؍آئی این ایس انڈیا)شمالی و وسطی ویت نام کے چھ صوبوں میں شدید بارشوں سے آنے والے سیلابوں اور مٹی کے تودے گرنے کے واقعات میں ہونے والی ہلاکتوں کی تعداد 54 تک پہنچ گئی ہے۔ اسی طرح لاپتہ افراد کی تعداد 39 بتائی گئی ہے۔ حکام کے مطابق شدید بارشوں سے متاثرہ علاقوں میں سفری نظام درہم برہم ہو کر رہ گیا ہے۔ کم از کم اکتیس زخمیوں کو ہسپتال پہنچایا جا چکا ہے۔ تیس ہزار مکانات کو تباہی و بربادی کا سامنا ہے۔ ویت نام کے قدرتی آفات سے نمٹنے والے ادارے کے مطابق امدادی کارروائیوں میں چھ سو کے قریب فوجی بھی پولیس کے ہمراہ ہیں۔ اسی دوران ویت نام میں ایک اور موسمی طوفان کی آمد متوقع ہے اور اس سے مجموعی صورت حال مزید خراب ہو سکتی ہے۔