کشمیر میں دہشت گردانہ حملہ :منگلورو میں وی ایچ پی اور بجرنگ دل اور کنداپور میں کانگریس کی طرف سے مذمت
کنداپور15؍فروری (ایس او نیوز) کشمیر کے پلوامہ میں جو دہشت گردانہ حملہ ہوا ہے اور 40 سی آر پی ایف کے جوان ہلاک ہوئے ہیں، اس کی مذمت میں کانگریس نے ایک میٹنگ منعقد کی ۔
کنداپور بلاک کانگریس کے صدر مالیاڈی شیورام شیٹی نے اجلاس سے خطا ب کرتے ہوئے کہاکہ ’’کشمیر میں ہونے والا یہ حملہ گزشتہ بیس برسوں میں سب سے زیادہ بھیانک حملہ ہے۔مرکزی حکومت کو چاہیے کہ وہ سرحدوں پر اپنی جان کی پروا کیے بغیر ملک کی حفاظت کرنے والے فوجیوں کی ہمت بندھائے۔
میٹنگ میں گوپال کرشنا شیٹی، کرشنا دیوا، نارائن اچار، ونود کراسترو، عبداللہ کوڈی، چندراشیکھر شیٹی، دھرم پرکاش، شوبھا سچیدانندا اور دیگر بہت سارے لیڈران موجود تھے۔
منگلورو میں وی ایچ پی اور بجرنگ دل نے اس حملے کے خلاف پی وی سی سرکل کے قریب احتجاجی مظاہرہ کیا۔اس موقع پر وی ایچ پی کے صدر جگدیش شینوا نے وزیر اعظم سے مطالبہ کیا کہ اب پاکستان پر دوسرا سرجیکل اسٹرائک اس گھناؤنے حملے کا جواب نہیں ہوگا بلکہ اس کے بدلے میں پاکستان کے خلاف جنگ چھیڑ دینی چاہیے۔تاکہ اسے دنیا کے نقشے مٹادیا جاسکے۔
وی ایچ پی کے ریجنل سیکریٹری شرن پمپ ویل نے کہا کہ اس حملے میں براہ راست پاکستان کا ہاتھ ہے۔ باہر سے زیادہ دہشت گرد ہمارے ملک کے اندر موجود ہیں۔ ان کے خلاف اقدام کرنا بہت ضروری ہے۔ اس حملے کو ملک کے اندر سے ہی انجام دیا گیا ہے جبکہ اس کا منصوبہ باہر پاکستان میں بنا تھا۔ مظاہرین کے تھوڑی دیر کے لئے راستہ روکو احتجاج بھی کیا۔
