نئی دہلی؍بنگلورو،9؍جنوری(پی ٹی آئی) سپریم کورٹ نے آج اشارہ دیا کہ تمل ناڈو اور کرناٹک کی ریاستوں کے درمیان دہائیوں پرانے کاویری آبی تنازعہ پر ایک ماہ کے اندر اپنا فیصلہ سنائے گا۔ عدالت عظمیٰ کا کہنا ہے کہ دودہائیوں سے زیادہ عرصہ سے اس معاملہ پر بہت سی پیچیدگیاں پیداہوچکی ہیں جنہیں دور کردیاجائے گا۔ عدالت نے کہا کہ دریائے کاویری کے معاملہ پر کوئی بھی فریق چارہفتوں بعد یعنی عدالت کے فیصلہ سنائے جانے کے بعدہی پہل کرسکتا ہے۔ کرناٹک، تملناڈو اور کیرلا کے درمیان کاویری کے پانی کی تقسیم پر کاویری خصوصی عدالت کے فیصلے کے خلاف ان ریاستوں کی درخواست پر عدالت عظمیٰ کی3رکنی بنچ نے20ستمبر 2017 کو ایک لمبی سماعت کے بعد اپنا فیصلہ محفوظ رکھاتھا۔ بنگلورو میں پینے کے پانی کی شدید قلت پر سپریم کورٹ سے مداخلت کی درخواست کرتے ہوئے کرن مجمدارشاہ کی قیادت میں ایک گروپ نے عدالت میں عرضی داخل کی تھی۔ بنگلور پولٹیکل آکشن کمیٹی کے جھنڈے تلے کمیٹی کی صدر کرن مجمدار شاہ اور سابق انفوسیس کے ڈائرکٹر اور ماہر تعلیم موہن داس پائی کی قیادت میں اس کمیٹی نے عدالت سے کہاتھا کہ شہر کو پینے کے پانی کی ضرورت کے لئے مناسب مقدار میں پانی کی فراہمی اور شہریوں کے جینے کے حق کے تحفظ کے لئے عدالت عالیہ مداخلت کرے۔ یہ درخواست بنگلور ومیں ہوئے تشدد کے بعد داخل کی گئی تھی اور کہاگیاتھا کہ شہرمیں غیر معمولی حالات ہیں جس کی وجہ سے عدالت کی مداخلت ضروری ہے۔