وینوگوپال نے ان پر الزامات لگانے والی عورت پر ہتک عزت مقدمہ دائر کرنا طے کیا
بنگلورو،14؍اکتوبر(ایس او نیوز؍عبدالحلیم منصور) اے آئی سی سی جنرل سکریٹری کے سی وینو گوپال نے کہا ہے کہ ان کی چالیس سالہ سیاسی زندگی میں ان پر کبھی کوئی سیاہ داغ نہیں لگ پایا ہے۔ ایک ایسی عورت جس پر چھتیس فوجداری مقدمے چل رہے ہیں،اس کے الزامات کی وجہ سے بی جے پی اور ہمنوا ان پر کیچڑ اچھالنے کی کوشش کررہے ہیں۔ اس عورت کے خلاف انہوں نے یرنا کولم کی عدالت میں ہتک عزت مقدمہ دائر کردیا ہے ۔ وینو گوپال نے چیلنج کیا کہ اس عورت کے الزامات اگر ثابت ہوگئے تو وہ سرگرم سیاست سے سنیاس لے لیں گے۔ ایک عورت کی طرف سے جنسی ہراسانی کے الزامات پر بی جے پی کی طرف سے کئے گئے احتجاج پر ردعمل ظاہر کرتے ہوئے وینو گوپال نے کہاکہ اپوزیشن پارٹیاں الزامات لگانے کیلئے ہی ہوتی ہیں ، جس وقت وہ الیکشن میں کھڑے تھے انہیں اس سے زیادہ بدنام کیاگیا۔ اس طرح کے الزامات سے وہ خوفزدہ ہونے والے ہیں اور نہ ہی اس وجہ سے ان کے حوصلے پست ہوں گے۔ بنگلور سے کیرلا کے الپے کیلئے بس سرویس کا افتتاح کرنے کے بعد انہوں نے یہ تبصرہ کیا۔ وزیراعظم نریندر مودی کے متعلق وزیر شہری ترقیات روشن بیگ کے تبصرہ پر وضاحت کرتے ہوئے وینوگوپال نے کہاکہ روشن بیگ نے دانستہ طور پر یہ بیان دیا ہو ایسا نہیں لگتا۔ بھلے ہی ان کا بیان غلط ہو، لیکن اس کے بعد انہوں نے معذرت خواہی بھی کرلی ہے،لیکن روشن بیگ کے اس بیان پر بی جے پی والوں نے جس طرح کے تبصرے کئے ہیں وہ بی جے پی کی اصل تہذیب کا عکاس ہے۔ وینو گوپال نے کہاکہ روشن بیگ نے وزیراعظم کے متعلق جن الفاظ کا استعمال کیاہے وہ نہیں کرنا چاہئے تھا۔ اس کا احساس خود انہیں بھی ہوچکا ہے۔ شہر بنگلور میں موسلادھار بارش اور جانی نقصانات پر تبصرہ کرتے ہوئے وینو گوپال نے کہاکہ شہر گلستان اگر آفات سماوی کا شکار ہوا ہے تو تمام کو مل کر عوام کی مدد کرنے کیلئے کام کرنا چاہئے۔اس معاملے میں گندی سیاست نہیں کی جانی چاہئے۔ وینو گوپال نے کہاکہ اے آئی سی سی نائب صدر راہول گاندھی نے بھی بنگلور میں بارش کی تباہ کاریوں کے متعلق ریاستی کانگریس سے رپورٹ طلب کی ہے اس سلسلے میں رپورٹ روانہ کرنے کے بعد ریاستی حکومت کو اور بھی فراخ دلی سے اقدامات کرنے کی ہدایت دی جائے گی۔