بھٹکل میں کانگریس کی طرف سے منکال وئیدیا اوربی جے پی کی طرف سے سنیل نائک نے داخل کیا پرچہ نامزدگی
بھٹکل:23/اپریل (ایس او نیوز)کرناٹکا ودھان سبھا انتخابات کے لئے پرچہ نامزدگی داخل کرنے کے لئے آخری تاریخ 24/ اپریل ہے اور آج پیر کو دو اہم سیاسی حریف پارٹیوں کے طرف سے پرچہ نامزدگی داخل کی گئی ہے۔ کانگریس کی طرف سے آج منکال وئیدیا نے اپنا پرچہ نامزدگی داخل کیا تو بی جے پی کی طرف سے سُنیل نائک نے سینکڑوں حمایتوں کے ساتھ روڈ شو کرتے ہوئے اپنا پرچہ نامزدگی داخل کیا۔
آج ایک آزاد امیدوار راجیش نائک نے بھی اپنا پرچہ نامزدگی داخل کیا ہے، جس کے ساتھ ہی آج جملہ 3پرچہ نامزدگی داخل کئے گئے ہیں۔
حالیہ رکن سمبلی اور کانگریس امیدوار منکال وئیدیا نے کسی طرح کی ریلی اور جلو س کے بغیر اپنے صرف 5حمایتیوں کو لے کر خاموشی کے ساتھ اسسٹنٹ کمشنر دفتر پہنچے اور اپنا پرچہ نامزدگی داخل کیا ۔ پرچہ نامزدگی سے قبل منکال وئیدیا نے چن پٹن شری ہنومنت مندر، نچل مکی وینکٹ رمن مندر سمیت کئی منادر کا درشن کیا تھا اور بھگوان سے پرارتھنا کے بعد اے سی دفتر پہنچے تھے۔ اس موقع پر ان کے ساتھ بھاسکر جی موگیر، بھاسکر نائک کائیکنی ، بابو کوبال اور بابو ناگپا ہیبلے موجود تھے۔
پرچہ نامزدگی کے بعد اخبارنویسوں سے گفتگو کرتےہوئے منکال وئیدیا نےکہاکہ رکن اسمبلی کی میعاد میں جو کچھ میں نے کام کیا ہے اس سے مجھے اطمینان ہے۔ مجھے یقین ہے کہ بھٹکل ہوناور حلقہ کے عوام کا بھرپورتعائون میرے ساتھ ہے اور عوام اس بار بھی ان کے ساتھ رہیں گے اور انتخابات میں کامیاب بنائیں گے۔
اس کے تھوڑی دیر بعد ہی ہزاروں حمایتیوں کےساتھ بی جےپی امیدوار سنیل بی نائک روڈ شو کے ذریعے اے سی دفتر پہنچے اور اپنا پرچہ نامزدگی داخل کیا۔ پرچہ نامزدگی سے قبل سنیل نائک نے نچل مکی وینکٹ رمن مندر، ماری کامبا مندر، مٹھلی لکشمی وینکٹیشور مندر سمیت کئی دیگر مندروں میں پہنچ کر پوجا پاٹ کی تھی جس کے بعد اے سی دفتر پہنچ کر اپنا پرچہ نامزدگی داخل کیا۔
ریلی میں لوگوں نے بی جے پی کے جھنڈوں کو تھامے بی جے پی اور سنیل نائک کے حق میں خوب نعرے بازی ہوئی ۔اس موقع پر ان کے ساتھ ایم پی اننت کمار ہیگڈے ، بی جے پی ضلعی صدر کے جی نائک،بھٹکل بی جےپی صدر راجیش نائک، منکی بی جے پی صدر سبرائے نائک موجود تھے۔
پرچہ نامزدگی کے بعد میڈیا سے بات کرتے ہوئے سنیل نائک نےکہاکہ بھٹکل میں صرف فلیکس میں ہی ترقی نظر آرہی ہے۔ یہاں اتی کرم جیسے کئی مسائل ہیں اور وہ عوام کے ان مسائل کے حل کے لئے ایمانداری کے ساتھ کوشش کریں گے۔ انہوں نے اس انتخابات میں اپنی جیت کو یقینی بتایا۔ حیرت کی بات یہ رہی کہ سنیل نائک کے ساتھ موجود ہزاروں لوگوں کی ریلی میں بی جے پی کے سنئیر لیڈران گوند نائک، جے ڈی نائک، کرشنا نائک و غیرہ نظر نہیں آئے۔
