بنگلورو، 7؍مارچ(ایس او نیوز) کانگریس رکن کونسل وی ایس اگرپا نے ریاستی بی جے پی صدر اور سابق وزیراعلیٰ یڈیورپا پر اپر بھدرا پراجکٹ کے سلسلے میں چار کروڑ روپیوں کی رشوت لینے کا الزام لگایا اور کہاکہ یڈیورپا کی اس مبینہ رشوت ستانی کا انکشاف محکمۂ انکم ٹیکس کی رپورٹ میں کیا گیا ہے۔ انہوں نے کہاکہ اس کیس میں یڈیورپا کے خلاف قانونی کارروائی ہونی چاہئے۔ اخباری نمائندوں سے بات چیت کرتے ہوئے اگرپا نے کہاکہ اپر بھدرا پراجکٹ کا کام آبپاشی کارپوریشن کے ذریعے 2007-08کے دوران کنٹراکٹ کی بنیاد پر شروع کیاگیا تھا۔ یڈیورپا کی صدارت میں آبپاشی کارپوریشن نے اپر بھدرا پراجکٹ کا ٹھیکہ 1033کروڑ کی لاگت پر مرڈیشور کارپوریشن کو دیاتھا۔ اس کمپنی کی ایک شریک آر این ایس ایل انفرااسٹرکچر کی طرف سے یڈیورپا کو ایک کروڑ روپیوں کی رشوت دی گئی ہے۔ 2009-10 کے دوران مزید ایک کروڑ روپے دئے گئے اور 2011-12میں دو کروڑ روپے ادا کئے گئے ، انکم ٹیکس کے دستاویزات میں یہ بات ظاہر ہوچکی ہے۔اس موقع پر اگرپا نے یہ دستاویزات بھی پیش کئے۔انہوں نے کہاکہ یڈیورپا نے آر این ایس ایل کمپنی سے تین سال کی مدت میں چار کروڑ روپے نقد حاصل کئے۔ محکمۂ انکم ٹیکس کی رپورٹ میں اب تک یہ واضح طور پر ظاہر نہیں کیا گیاتھا۔ تاہم معتبر اطلاع کی بنیاد پر انکم ٹیکس افسران نے چھاپے مارکر جب کنٹراکٹ کے متعلق دستاویزات کا جائزہ لینے پر مجبور ہوئے تو اس وقت یہ معاملہ سامنے آیا۔ محکمۂ انکم ٹیکس نے اس سلسلے میں یڈیورپا پر دو کروڑ روپیوں کا جرمانہ بھی عائد کیا ہے۔ انہوں نے کہاکہ وزیراعظم نریندر مودی نے بنگلور میں بی جے پی کے جلسۂ عام سے خطاب کرتے ہوئے سدرامیا کو دس فیصد حکومت قرار دیاتھا تو اب یڈیورپا کی اس حرکت کے بعد وہ خود واضح کریں کہ ریاست میں یڈیورپا حکومت کتنے فیصد پر کام کررہی تھی؟۔ انہوں نے کہاکہ یڈیورپا پر رشوت ستانی کا الزام مرکزی حکومت کے ایک ادارے نے لگایا ہے ، اگر یہ الزام غلط ہے تو متعلقہ انکم ٹیکس افسران پر جھوٹے رپورٹ تیار کرنے کے لئے کارروائی کی جائے اور اگر الزام صحیح ہے تو یڈیورپاکو جوابدہ بنایا جائے۔ اس موقع پر ریاستی وزیر برائے ٹرانسپورٹ ایچ ایم ریونا ، کے پی سی سی میڈیا سیل کے سربراہ پروفیسر رادھا کرشنا اور دیگر موجود تھے۔