اُترپردیش کے وزیراعلیٰ یوگی کی ڈیڈ لائن ختم، صرف 19وزراء نے دی جائیداد کی تفصیلات
نئی دہلی،19؍اپریل (ایس او نیوز/آئی این ایس انڈیا ) 19؍مارچ کو حلف لیتے ہی وزیراعلیٰ یوگی آدتیہ ناتھ نے اپنے تمام وزراء کو اپنے آفس میں چائے پر مدعوکیا تھا۔اسی بہانے انہوں نے تمام وزراء سے ملاقات کی اور ان کے ساتھ چائے پر چرچا کی تھی۔اسی ملاقات کے دوران یوگی نے تمام وزراء کو پندرہ دنوں میں اپنی جائیداد کی تفصیلات دینے کو کہا تھا، لیکن یہ میعاد 5 ؍اپریل کو ختم ہو گئی۔آپ کو جان کر تعجب ہوگا ، کہ 5/اپریل تک صرف 13 وزراء نے ہی اپنی جائیداد کی معلومات دی ۔
یوپی کے وزیر خزانہ راجیش اگروال کے پاس سب کو اپنی جائیداد کی تفصیلات جمع کرانی تھی ۔یوگی کے وزراء کس طرح اپنی جائیداد کی تفصیلات دیں؟ اس کے لیے وزیر اعلی یوگی آدتیہ ناتھ نے ایک فارم بھی بنوایا تھا، جس میں سب کو یہ بتانا ہے کہ وزیر بننے سے پہلے ان کی کمائی کا ذریعہ کیا تھا۔کسی کمپنی سے ان کا کوئی لینادینا تو نہیں ہے؟ کس سال میں وزیر موصوف نے کون سی جائیداد خریدی؟میعاد ختم ہونے کے بعد جب صرف 13وزراء نے ہی یوگی کی بات مانی، تو پھر وزیر اعلی نے پھر سے 13 ؍اپریل کو ایک اور خط لکھا اور یوگی نے اس بار 16 ؍اپریل تک کی ڈیڈلائن دی ۔
مگر افسوس دوسرے خط کے بعد اب صرف6 مزید وزراء نے ہی اپنی جائیداد کی تفصیلات فراہم کیہے، یعنی مجموعی طورپر ابھی تک صرف 19وزراء نے ہی اپنی جائیداد کی تفصیلات مہیاکرائی ہے۔ دیکھنا یہ ہے کہ دوسری بار دی گئی مدت ختم ہونے کے بعد اب وزیراعلیٰ یوگی جائیداد کی تفصیلات مہیا نہ کرانے والے وزراء کے ساتھ کس طرح پیش آتے ہیں۔