دوسرے اضلاع کے مقابلے میں ضلع شمالی کینرا میں پوکسو کے معاملات زیادہ ہیں۔ کاروار میں مہیلا آیوگ چیر پرسن کا تبصرہ 

Source: S.O. News Service | By Shahid Mukhtesar | Published on 11th July 2018, 8:10 PM | ساحلی خبریں |

کاروار 11؍جولائی (ایس او نیوز)خواتین کے ساتھ ہونے والے جنسی جرائم، گھریلو تشدد اور پیشہ ورانہ ماحول میں جنسی ہراسانی کی صورتحال کا جائزہ  لینے کے لئے ریاستی مہیلا آیوگ (ریاستی خواتین کمیٹی)  کی چیر پرسن ناگ لکشمی بائی نے محکمہ جاتی افسران کے ساتھ ضلع ڈپٹی کمشنر دفتر کے ہال میں میٹنگ منعقد کی اور خواتین کی  حفاظت اور ان کی فلاح و بہبود کے تعلق سے سرکاری سطح پر جاری اسکیموں پر عمل در آمد کا جائزہ لیا۔

مہیلا آیوگ کی چیر پرسن نے لیبر ڈپارٹمنٹ سے پوچھا کہ ضلع شمالی کینرا کی ماہی گیر طبقے کی خواتین گوا ، کیرالہ، منگلورو اور مہاراشٹرا کے مختلف مقامات پر مچھلیوں کی فیکٹریوں میں ملازمت کے لئے جارہی ہیں، تو ان کے تحفظ اور سلامتی کے تعلق سے ڈپارٹمنٹ  نے  کیا اقدامات کیے ہیں۔ لیکن لیبر ڈپارٹمنٹ کے کلیدی ذمہ دار کی غیر حاضری میں محکمہ کے نمائندگی کرنے والے ایف ڈی سی نے کوئی بھی اطمینان بخش جواب نہیں دیا تو آیوگ کی چیر پرسن نے اپنے عدم اطمینان کا اظہار کرتے ہوئے کہا کہ پوری ریاست میں لیبر ڈپارٹمنٹ عوام کے مفاد کے لئے کام کرنے میں پوری طرح ناکام ہے۔ انہوں نے مذکورہ آفیسر کو حکم دیا کہ آئندہ 20دنوں کے اندر اس سلسلے میں ایک تفصیلی رپورٹ لازمی طور پر انہیں اور ڈپٹی کمشنر کو بھیجی جائے۔ 

ضلع میں موجود خواتین کے لئے مخصوص واحدمہیلا پولیس اسٹیشن کی بدتر حالت کا تذکرہ کرتے ہوئے ناگ لکشمی بائی نے کہاکہ میٹنگ سے پہلے انہوں نے اس پولیس اسٹیشن کا معائنہ کیا تو دیکھا کہ وہاں پولیس افسران اور اہلکاروں کے لئے  باتھ روم کی سہولت بھی نہیں ہے۔ اس کے علاوہ کمپیوٹر اور دیگر ضروری ساز وسامان بھی فراہم نہیں کیا جارہا ہے۔روزمرہ کے لئے ضروری بعض اشیاء خریدنے کے لئے پولیس اہلکار خود اپنی جیب سے پیسہ خرچ کر رہے ہیں۔ خواتین پولیس کے لئے موٹر گاڑیاں دستیاب نہیں ہیں۔ اس پولیس تھانے میں صرف ۶ افراد پر مشتمل عملہ موجود ہے جبکہ مزید ۳۶ اسامیوں کی وہاں ضرورت ہے۔مہیلا پولیس اسٹیشن کا کمرہ مرغیوں کے ڈربے سے بھی چھوٹا ہے۔ 

اس کے جواب میں میٹنگ میں موجود ضلع سپرنٹنڈنٹ ونائیک پاٹل نے کہا کہ ٹاؤن پولیس اسٹیشن سے متصل ترکاری مارکیٹ کو دوسری جگہ منتقل کرکے وہاں پر مہیلا پولیس اسٹیشن کی ایک جدید اور آراستہ عمارت تعمیر کرنے کا منصوبہ بنایا گیا ہے اور یہ تجویز حکومت کو بھیج دی گئی ہے۔ ایس پی کے مطابق محکمہ پی ڈبلیو ڈی نے اس مقام کا معائنہ کیا ہے اور تجویز منظور کیے جانے کے مرحلے میں ہے۔لہٰذا یہاں جلد ہی تعمیر ات شروع کی جائیں گی۔اس پر اطمینان ظاہر کرتے ہوئے ناگ لکشمی بائی نے ایس پی سے درخواست کی کہ نئی عمارت تعمیر ہونے تک کم از کم خواتین پولیس افسران کے لئے مناسب واش روم کا انتظام کیا جائے۔

مہیلا آیوگ چیر پرسن نے بتایا کہ مجبور اور بے گھر ہونے والی خواتین کے لئے قائم ضلع کے باز آباد کاری مرکز ’سویکار‘ میں عشق و محبت کے چکر میں پھنس کر زندگی برباد کرنے والی 17نوجوان لڑکیاں موجود ہیں۔ جن کی عمریں 19سے 24سال کے درمیان ہیں۔ان کی تعلیم بھی ادھوری رہ گئی ہے۔ اس لئے محکمہ بہبودئ خواتین و اطفال کو چاہیے کہ ان کو تعلیم سے محروم نہ رکھتے ہوئے آگے پڑھائی جاری رکھنے کی سہولت ان خواتین کو فراہم کی جائے۔

میٹنگ میں ضلع ڈپٹی کمشنر ایس ایس نکول، محکمہ بہبودئ خواتین و اطفال کے ڈپٹی ڈائریکٹر راجیندرا بیکل اوردیگر محکمہ جات کے ذمہ داران موجود تھے۔

میٹنگ کے بعداخبار نویسوں سے گفتگو کرتے ہوئے ناگ لکشمی بائی نے بتایا کہ مہیلا آیوگ کی چیر پرسن کا عہدہ سنبھالنے کے بعدوہ ایک سال کے اندر ریاست کے مختلف اضلاع کا دورہ کرکے خواتین کے مسائل کوجاننے اور سمجھنے کی پوری کوشش کررہی ہیں۔جہاں تک کم عمر لڑکیوں کے ساتھ جنسی زیادتی اور ہراسانی کے لئے پوکسو ایکٹ کے معاملات کا تعلق ہے اس کی تعداد دوسرے اضلاع کے مقابلے میں ضلع شمالی کینرا میں زیادہ سامنے آرہی ہے۔ بچوں کے استحصال کو روکنے کے لئے متعلقہ محکمہ کو واضح ہدایات دی گئی ہیں۔انہوں نے بتایا کہ کلبرگی اور ہاویری ضلع میں خواتین کے پیٹ سے رحم (یوٹیرس) نکالنے کا دھندہ بڑے پیمانے پر چل پڑا ہے۔ اس کی بنیادی وجہ وہاں پر پائی جانے والی غربت کے علاوہ جہالت اور خوف ہے۔ ایسی خواتین کے لئے خودروزگار اسکیم کے تحت پیکیج فراہم کرنے کی سفارش حکومت سے کی گئی ہے۔ 

ایک نظر اس پر بھی

چیتے کی کھال فروخت کرنے کے دوران کنداپور میں بھٹکل کے پانچ افراد سمیت دس گرفتار

یہاں شاستری سرکل کے قریب غیر قانونی طورپر چیتے کی کھال فروخت کرنے کے الزام میں بینگلور کی سی آئی ڈی فوریسٹ یونٹ  نے دس افراد کو گرفتار کرلیا ہے جس میں پانچ کا تعلق بھٹکل، تین کا تعلق بیندور اور ایک ایک کا تعلق ، منڈگوڈ اور  ہوناورسے ہے۔ گرفتاری کی یہ واردات جمعہ کی دوپہر کو ...

مینگلور کے قریب پڈیل ہائی وے پر گیس ٹینکر اُلٹ گئی؛ گیس رسنے کی اطلاع کے بعد نیشنل ہائی وے بند

یہاں پڈیل۔ مرولی ہائی وے پر ایک گیس سے بھری ٹینکر اُلٹ جانے سے  گیس رسنا شروع ہوجانے  سے نیشنل  ہائی وے کو پولس نے بند کردیا ہے جس کے نتیجے میں  سڑک کے دونوں کنارے  ٹریفک نظام درہم برہم ہوگیا ۔ بتایا گیا ہے کہ پولس نے حفاظتی اقدامات کے تحت آس پاس کے سبھی علاقوں کے مکینوں کو ...

کاروار:انکولہ ۔ہبلی ریلوے لائن کی سدراہ بنے ماحولیاتی این جی اوز کو ملنے والی مالی امداد کی جانچ کریں : رکن اسمبلی روپالی نائک کامرکزی ریلوے وزیر سے مطالبہ

ریاست کے ساحلی علاقے سے شمالی کرناٹک  کو جوڑنے والی ’قسمت کی ریکھا‘ انکولہ ۔ ہبلی ریلوے لائن کی تعمیرمیں جو ماحولیاتی اداروں ، این جی اوزاور ماہرین سدراہ بنے ہوئے ہیں دراصل یہ تمام  بیرونی ممالک کی  کروڑوں دولت کے تعاون سے بےبنیاد چیخ وپکار کررہے ہیں کاروار انکولہ کی رکن ...

کاروار میں انکولہ ۔ہبلی ریلوے لائن منصوبےکو جاری کرنےعوامی احتجاج : قومی شاہراہ بند کرنے پر احتجاجی پولس کی تحویل میں

انکولہ۔ ہبلی ریلوے لائن منصوبہ، سرحد علاقہ کاروار میں صنعتوں کا قیام سمیت مختلف مانگوں کو لے کر لندن برج پر قومی شاہراہ کو بند کرتے ہوئے احتجاج کی تیاری میں مصروف کنڑا چلولی واٹال پارٹی کے واٹال ناگراج سمیت 21جہدکاروں کو پولس نے گرفتار کرنے کے بعد رہاکردیا۔