کاروار،7؍ اکتوبر ( ایس او نیوز ) اُتر کنڑا میں آن لائن راشن کارڈ جاری کرنے کا عمل 100فیصد مکمل ہوچکا ہے، ضلع میں اب تک راشن کارڈ کے لئے23,516 عرضیاں موصول ہوئی تھیں، اب سب کی جانچ کر کے راشن کارڈ کی چھپائی کرنے کے لئے بھیج دیا گیا ہے، جلد ہی عرضی داروں کو راشن کارڈ مل جائیں گے ؛ یہ بات  ریاستی وزیر برائے غذا شہری رسدات یوٹی قادر بتائی۔ 

 یہاں کاروار کے انسپکشن بنگلہ میں محکمہ کے افسران کی میٹنگ میں محکمہ کی کارکردگی کا جائزہ لینے کے بعد اخبارنویسوں سے گفتگو کرتے ہوئے  انہوں نے کہا کہ اُتر کنڑا ضلع میں راشن کارڈ جاری کر نے کے لئے آن لائن عرضیاں موصول ہوئی تھیں، اس میں کارڈ جاری کرنے کا عمل 100فیصد مکمل ہواہے، وزیر موصوف نے بتایا  کہ اب بی پی ایل راشن کارڈ جاری کرنے کے لئے آمدنی کی حد بڑھا کر ایک لاکھ بیس ہزار روپئے کردی گئی ہے، تا کہ زیادہ سے زیادہ لوگوں کو اس سے فائدہ حاصل ہو ، انہوں نے کہا کہ راشن کارڈ میں ہونے والی غلطیوں کی تصحیح کے لئے ہر تعلقہ میں ایک کنٹرول روم قائم کیا جائے گا۔ وزیر موصوف نے بتایا کہ ریاست بھر میں راشن کارڈ جاری کرنے کے لئے 16.5لاکھ آن لائن عرضداشتیں وصول ہوئی تھی، ان میں سے اب تک تین لاکھ راشن کارڈ جاری کئے جاچکے ہیں، باقی راشن کار ڈبھی آئندہ دو مہینے کے عرصہ میں جاری کئے جائیں گے۔ انہوں نے بتایا کہ اب تک ریاست بھر میں دس لاکھ بوگس راشن کارڈ منسوخ کئے جاچکے ہیں، اس کی وجہ سے 4000میٹر ک ٹن چاول کی بچت ہوئی ہے، انہوں نے کہا کہ ہر ایک راشن ڈپو میں بی او ایس مشین  لگائی جائے گی ، جہاں راشن کارڈ والے کے انگھوٹھے کی بائیو میٹر ک جانچ کے بعد راشن کارڈ دیا جائے گا۔ اس سہولت کی وجہ سے ایک مقام کا راشن کا رڈ رکھنے والا دوسرے مقام پر بھی راشن کارڈ دکھلا کر بائیو میٹر جانچ کے بعد اپنا راشن لے سکتا ہے۔