بھٹکل 28/جنوری (ایس او نیوز) بھٹکل میں آتی کرم زمینات پر تعمیر پرانے مکانوں کی درستگی کرنے نہ دینے  اور غریب لوگوں کو ہراساں کئے جانے کی شکایت پر ضلع اُترکنڑا کے انچارج وزیر آر وی دیش پانڈے نے  محکمہ جنگلات کے آفسر کو آڑے ہاتھ لیا اور  سوال کیا کہ غریب لوگ سالہاسال سے آتی کرم زمینات پر رہتے آرہے ہیں انہیں  گھر کی مرمت کی ضرورت پیش آنے پر  کیوں ستایا جارہا ہے ؟  واردات آج پیر کو بھٹکل سرکیوٹ ہاوس میں پیش آئی جب  آتی کرم ہوراٹا سمیتی (آتی کرم جدوجہد  کمیٹی) کے رکن محمد رضوان نے  وزیر موصوف کو واقعے سے آگاہ کرایا۔ اس موقع پر  سماجی اداروں کے ذمہ داران نے بھی وزیر کو بتایا کہ بارش کے موسم میں لوگ اپنے مکان کی چھت کو درست کرنے کی کوشش کرتے ہیں تو محکمہ جنگلات کے اہلکار وہاں آجاتے ہیں اور کام کو روک کر گھروالوں کو ہراساں کرتے ہیں۔ اس بات پر گرم دیش پانڈے نے  ڈسٹرکٹ فوریسٹ آفسر (ڈی ایف او) مسٹر وسنت ریڈی سے فون پر گفتگو کرتے ہوئے اُنہیں حکم دیا کہ وہ اپنے اہلکاروں کی خبر لیں ۔

بعد میں  انہوں نے موقع پر موجود آر ایف او شنکر گوڈا کو اپنے قریب بلاکر پوچھا کہ آپ بھی  مڈل کلاس طبقہ سے تعلق رکھتے ہیں آپ کو غریب عوام کے مسائل ہم لیڈران سے زیادہ معلوم ہونے چاہئے، پھر بھی آپ لوگ غریب لوگوں کو کیوں تنگ کرتے ہو ؟ دیش پانڈے نے آر ایف او کو آڑے ہاتھ لیتے ہوئے سوال کیا کہ  غریب لوگ جب اپنے مکان کی درستگی کرتے ہیں تو اس سے آپ لوگوں کو کیا پریشانی ہے ؟ انہوں نے آر ایف او کو متنبہ کیا کہ اُنہیں اس طرح کی شکایت آئندہ نہیں آنی چاہئے۔

اس موقع پر مجلس اصلاح و تنظیم بھٹکل کے ایک وفد نے بھی وزیرموصوف سے ملاقات کی اور بھٹکل حلقہ کےعوام کے ساتھ ایک نشست منعقد کرنے  اور عوام الناس کے مسائل کی طرف توجہ دینے وقت  نکالنے کی اپیل کی۔ دیش پانڈے نے بتایا کہ عوام کے مسائل سننے اور اُنہیں حل کرنے کی طرف توجہ دینے وہ ہمیشہ تیار ہیں۔ انہوں نے وعدہ کیا کہ آئندہ کوئی مناسب وقت دیکھ کر  آپ لوگوں کے ساتھ ایک  نشست رکھیں گے۔

بھٹکل آمد کو دیکھتے ہوئے بعض اداروں کےذمہ داران نے اپنے اپنے مسائل پیش کرتے ہوئے میمورنڈم دے کر مسائل حل کرنے کی درخواست کی۔ دیش پانڈے کے ساتھ اُترکنڑا ضلع پنچایت صدر جئے شری موگیر، سابق رکن اسمبلی منکال وئیدیا،  جے ڈی نائک، ضلع پنچایت ممبرس پشپا نائک، سندھو بھاسکر نائک، شری پد کامتھ، اے پی ایم سی صدر گوپال نائک، چندر شیکھر گوڈا، ویٹھل نائک، سنتوش نائک، قومی سماجی ادارہ کےذمہ داران عنایت اللہ شاہ بندری، الطاف کھروری، مولوی یاسر برماور ندوی، کے ایم اشفاق، عبدالرقیب ایم جے ندوی،  ڈی ایف صدیق،  ڈاکٹر ایس ایم سید سلیم ، جالی پنچایت رکن عبدالرحیم و دیگر کافی لوگ موجود تھے۔