یونیسکو سے امریکی و اسرائیلی علیحدگی، فیصلہ افسوس ناک ہے، گوٹیرش
واشنگٹن،13؍اکتوبر(ایس او نیوز؍آئی این ایس انڈیا)اقوام متحدہ کے سیکرٹری جنرل انٹونیو گوٹیرش نے یونیسکو سے علیحدگی کے امریکی اور اسرائیلی فیصلے پر گہرے افسوس کا اظہار کیا ہے۔ انہوں نے کہا کہ اس پیشرفت کے باوجود عالمی ادارہ ان ممالک سے روابط بحال اور برقرار رکھے گا۔ یونیسکو کی سبکدوش ہونے والی سربراہ ایرینا بوکوفا نے بھی اس پیشرفت پر تاسف کا اظہار کرتے ہوئے کہا کہ اس سے ادارے کی کثیر القومی شناخت پر ضرب پڑے گی۔ جمعرات کو امریکا نے اقوام متحدہ کے ثقافتی، سائنسی، اور تعلیمی ادارے یونیسکو پرجانبدارنہ رویہ اپنانے کا الزام عائد کرتے ہوئے اس سے علیحدگی اختیار کرنے کا اعلان کیا تھا۔ اس کے بعد اسرائیل نے بھی اس ادارے کو خیرباد کہنے کا فیصلہ سنا دیا تھا۔ اسرائیلی حکومت نے امریکی فیصلے کو جرات مندانہ اور اخلاقی اقدار مبنی قرار دیا ہے۔