بنگلورو،17؍اگست(ایس او نیوز) ریاست کے 108بلدی اداروں کے لئے انتخابات کی تاریخ جو 29 اگست اور 3؍ ستمبر کو طے کی گئی تھی اس میں معمولی ترمیم لاتے ہوئے ریاستی الیکشن کمیشن کی طرف سے نئی تاریخوں کا اعلان کیا گیا ہے۔

تین سٹی کارپوریشنوں کے لئے انتخابات 3؍ ستمبر کو ہونے جارہے ہیں جبکہ باقی 105 بلدی اداروں کے لئے جن میں سٹی میونسپل کونسل، ٹاؤن میونسپل کونسل اور ٹاؤن پنچایت شامل ہیں۔ ان کے لئے انتخابات 29 اگست کو طے تھے، تاہم اس تاریخ میں ترمیم کرتے ہوئے اب تین سٹی کارپوریشنوں کے ساتھ باقی 105 اداروں کے لئے بھی پولنگ 31اگست کو ہی کرائی جائے گی۔ ان انتخابات کے لئے پرچۂ نامزدگی داخل کرنے کی آخری تاریخ 18اگست ہوگی۔ 20اگست کو نامزدگیوں کی جانچ کی جائے گی اور 23اگست کو نامزدگیاں واپس لی جاسکتی ہیں۔

ان بلدی اداروں میں اگر کہیں دوبارہ پولنگ کی ضرورت پڑے تو یہ 2؍ ستمبر کو ہوگی، جبکہ ووٹوں کی گنتی 3؍ ستمبر کو ایک ساتھ کرائی جائے گی۔ ریاست کے سبھی بلدی اداروں کے لئے انتخابی عمل 3؍ ستمبر کی شام تک مکمل کرلیا جائے گا۔