لکھنؤ ،13؍ اکتوبر (ایس او نیوز؍آئی این ایس انڈیا) جب سے اکھلیش یادو کی سماج وادی پارٹی سے شیو پال الگ ہوئے ہیں اس وقت سے شیوپال یادو کو بی ایس پی سربراہ مایاوتی والا سرکاری بنگلہ ملا ہے، اس کے بعد سے اتر پردیش کی سیاست میں کئی طرح کی قیاس آرائیاں کی جارہی ہیں۔اتر پردیش کے سابق وزیر اور سماج وادی سیکولر مورچہ کے بانی شیوپال یادو اور یوگی حکومت کے درمیان نزدیکیاں مسلسل بڑھ رہی ہیں۔ سیکولر مورچہ کے ذرائع کے مطابق، حکومت سے قریبی کی وجہ سے ہی انہیں مایاوتی کا بنگلہ الاٹ کر دیا گیا۔اس دوران حکومت کے ذرائع کی مانیں تو جلد ہی شیو پال کو بھی سابق وزیر اعلی اکھلیش یادو کے برابر زیڈ سیکورٹی دی جا سکتی ہے۔محکمہ داخلہ کے ذرائع کے مطابق حکومت شیو پال کو بھی اکھلیش کی طرح ’زیڈ پلس‘ کا تحفظ دینے جا رہی ہے۔حالانکہ اس کی سرکاری تصدیق کوئی نہیں کر رہا ہے، لیکن اقتدار کے گلیاروں میں یہ بحث زوروں پر ہے کہ بہت جلد شیوپال بھی زیڈ سیکورٹی زمرہ کے تحت کمانڈوسے گھرے نظر آئیں گے۔ذرائع کے مطابق شیوپال اور وزیر اعلی کے درمیان ہوئی ملاقات کے بعد حکومت نے شیو پال کے قریبی رشتہ دار آئی اے ایس افسر اجے یادو کی مقرہ مدت بڑھانے کی منظوری دے دی۔تبھی شیو پال اور حکومت کے درمیان قربت بڑھنے کی بات کہی جانے لگی تھی۔مانا جا رہا ہے کہ اکھلیش سے ناراضگی کے بعد سی ایم یوگی نے شیو پال کو تحفے کے طور پر مایاوتی کا پرانا سرکاری بنگلہ دیا ہے۔حالانکہ شیوپال بھی بی جے پی سے قربتوں کی خبروں کی تردید کر چکے ہیں۔