غیرمطمئن کانگریسی رکن اسمبلی بی سی پاٹل کی سدرامیا سے ملاقات؛کہا، کانگریس پارٹی نہیں چھوڑوں گا
بنگلور، 9 فروری (ایس او نیوز) ہیرےکیرور سے کانگریس کے غیرمطمئن رکن اسمبلی بی سی پاٹل نے ہفتے کو یہاں سابق و زیراعلیٰ اور قانون ساز پارٹی کے لیڈر سدرامیا سے ان کی رہائش گاہ پر ملاقات کی۔ مسٹر پاٹل ہفتے کو قانون ساز پارٹی کی میٹنگ میں شامل نہیں ہو ئے تھے، جس سے پارٹی کے وہپ کی خلاف ورزی ہوئی تھی۔
بتایا جارہا ہے کہ اس دوران مسٹر پاٹل نے میٹنگ میں موجود نہ رہنے کے بارے میں مسٹر سد رامیا کو وضاحت پیش کی۔ مسٹر پاٹل نے سد رامیا سے ملاقات کے بعد نامہ نگاروں کو بتایا کہ ان کا پارٹی چھوڑنے یا مخالف خیمے میں شامل ہونے کا کوئی ارادہ نہیں ہے ۔ کابینہ میں شامل ہونے کی اہلیت رکھنے اور خود کو مضبوط دعویدار قرار دیتے ہوئے انہوں نے کہاکہ میں پارٹی میں رہوں گا اور جے ڈی ایس کانگریس اتحاد ی حکومت گرانے کی کوششوں میں شامل نہیں رہوں گا۔