اناؤ ،22؍اپریل (ایس او نیوز؍ آئی این ایس انڈیا )اجتماعی آبروریزی کے ساتھ ہی متاثرہ کے والد کا جیل میں قتل کے معاملے میں بھارتیہ جنتا پارٹی کے ممبر اسمبلی کلدیپ سنگھ سینگر کے بھائی اور پانچ ساتھیوں کی آج سی بی آئی ریمانڈ ختم ہو گئی۔اس کے بعد پانچوں کو جیل بھیج دیا گیا۔ سی بی آئی اب اس معاملے میں ایک بار پھر اناؤ کے بانگرمؤ سے رکن اسمبلی کلدیپ سنگھ سینگراور خاتون ششی سنگھ پر اپنا شکنجہ کسنے کی تیاری میں ہے۔اجتماعی آبروریزی متاثرہ کے والد کے قتل کے ملزم اور رکن اسمبلی کلدیپ سنگھ سینگرکے بھائی اتل سینگر اور اس کے پانچ ساتھیوں کی ریمانڈ آج صبح دس بجے ختم ہو گئی تھی۔آج ان تمام کو عدالت میں پیش کیا گیا۔جہاں سی بی آئی کے دوبارہ ریمانڈ نہیں مانگنے پر عدالت نے سب کو اناؤ ضلع جیل بھیج دیا۔ اناؤ اجتماعی آبروریزی اور جیل میں متاثرہ کے والد کے قتل کے معاملے کی تحقیقات کر رہی سی بی آئی نے گزشتہ جمعرات کو متاثرہ، اس کی ماں اور چچا سے پوچھ گچھ کی تھی۔دہلی سے اناؤ آئی سی بی آئی کی اسپیشل ٹیم نے خاندان سے واقعہ کے بارے میں مکمل معلومات لی تھی۔سی بی آئی کو متاثرہ کے والد کے خلاف پولیس کی ایف آئی آر فرضی ہونے کے کئی ثبوت ملے ہیں۔