بے روزگاروں کو فروغ ہنر کی تربیت کیلئے خصوصی محکمہ قائم : سدرامیا
بنگلورو،6؍جون(ایس او نیوز) بے روزگار نوجوانوں کو خود روزگار کی تربیت اور انہیں اپنے پیروں پر کھڑا کرنے میں مدد کیلئے ریاستی حکومت نے فروغ ہنر کا ایک مخصوص محکمہ قائم کیاہے، اس محکمہ کے تحت رواں سال پانچ لاکھ نوجوانوں کو روزگار دینے کا نشانہ مقرر کیاگیا ہے۔ یہ بات آج ریاستی اسمبلی کو وزیر اعلیٰ سدرامیا نے بتائی۔ وقفۂ سوالات میں ڈاکٹر سدھاکر کے سوال کا جواب دیتے ہوئے سدرامیا نے کہاکہ محکمۂ فروغ ہنر ان کے ماتحت ہے۔ مختلف محکموں میں رائج فروغ ہنر کی اسکیموں کو یکجا کرکے اس محکمہ کے ذریعہ انہیں عملی شکل دی جارہی ہے۔ آنے والے دنوں میں یہ محکمہ حکومت کی تمام تربیتی اسکیموں کا نفاذ ایک چھت تلے کرنے کا منصوبہ رکھتا ہے۔ انہوں نے کہاکہ آج مختلف فنون کے ماہرین کی بازار میں مانگ بڑھتی جارہی ہے۔اسی مقصد کے تحت فروغ ہنر کیلئے یہ شعبہ قائم کیا گیا ہے۔ گزشتہ سال شروع کئے گئے محکمہ کے ذریعہ اب تک 1.60 لاکھ نوجوانوں کو فروغ ہنر کی تربیت سے آراستہ کیاگیا ہے۔حال ہی میں ریاستی حکومت نے کوشلیا مہم شروع کی ہے، جس کے تحت تربیت کیلئے نوجوانوں کا اندراج جاری ہے۔ انہوں نے کہاکہ اگلے تین سے چھ ماہ کے دوران پانچ لاکھ نوجوانوں کو فروغ ہنر کی تربیت سے آراستہ کرنے کا منصوبہ تیار ہے۔ انہوں نے کہاکہ ان پانچ لاکھ نوجوانوں کو آئی ٹی آئی ، ڈپلوما ، انجینئرنگ اور دیگر کورسوں کی تربیت سے آراستہ کیا جائے گا۔ اس موقع پر اپوزیشن لیڈر جگدیش شٹر نے کہاکہ نئے محکمہ کے قیام کا اعلان حالانکہ بجٹ میں کیاگیا ، لیکن اس کا حکمنامہ مئی میں جاری ہوا ہے۔ حکمنامہ کے اجراء میں اس قدر تاخیر نہیں ہونی چاہئے تھی۔ اس پر وزیر اعلیٰ سدرامیا نے جواب دیتے ہوئے کہاکہ یہ محکمہ گزشتہ سال وجود میں آیا رواں سال تربیت مکمل کرنے اور نئے داخلوں کا اعلان کرنے میں تاخیر ہوئی ، آئندہ سال اس طرح کی تاخیر نہ ہونے پائے اسی مقصد کے تحت کوشلیا کر اسکیم کو تیزی سے لاگو کیاگیا ہے۔ اس سے قبل سدھاکر اور دیگر نے بھی وزیر اعلیٰ سے مختلف امور پر تفصیلات طلب کیں ۔