الحدیدہ پورٹ کا انتظامی بندوبست یو این کے پاس ہے: عسیری
ریاض،21مارچ(ایس او نیوز/آئی این ایس انڈیا)سعودی عرب کے وزیر دفاع کے مشیر اور عرب اتحادی فوج کے ترجمان جنرل احمد عسیری نے ان خبروں کی سختی سے تردید کی ہے جن میں دعوی کیا تھا کہ اتحادی فوج نے یمن کی الحدیدہ بندرگاہ کی حفاظت کے لئے اقوام متحدہ سے مدد کی اپیل کی ہے۔ ایک بیان میں جنرل عسیری نے واضح کیا کہ اقوام متحدہ الحدیدہ بندرگاہ پر انتظامی معاملات کی نگرانی کرتا ہے تاکہ اسے جارحانہ کارروائیوں کے لئے استعمال نہ کیا جا سکے۔الحدیدہ بندرگاہ یمن میں عدن کے بعد مغربی سحال پر دوسری بڑی اور اہم پورٹ ہے۔ اپنے اسٹرٹیجک محل وقوع اور بین الاقوامی روٹ کی قربت کی وجہ سے یہ بندرگاہ انتہائی اہمیت کی حامل ہے۔ یہ بندرگاہ آبنائے باب المندب کے قریب واقع ہے۔ نیز یہ علاقہ مون سون جیسی موسمی تبدیلیوں اور مد وجزر سے قدرتی طور پر محفوظ ہے۔بندرگاہ کا رقبہ سوا تین لاکھ مربع میڑ پر محیط ہے۔ یہاں موجود دس برتھوں پر 9 ملین ٹن مال اتارنے کی سہولت موجود ہے۔ 250 میٹر پر محیط دو برتھیں تیل اور دیگر پٹرولیم مصنوعات اتارنے کے لئے استعمال ہوتی ہیں۔ بندرگاہ میں 38 ہزار مربع میٹر پر محیط 12 ویئر ہاوسز بھی موجود ہیں۔