اڈپی:اسپتال سے بچی کو چرانے والی خاتون پولیس کی گرفت میں
اڈپی 17؍مئی (ایس او نیوز)اڈپی ضلع سرکاری اسپتال میں ایک چھ سالہ بچی کو اغوا کرنے کے الزام میں خاتون کوعوام نے دھر لیا اور پھر اسے پولیس کے حوالے کیا ہے۔
واقعہ کی تفصیل یہ بتائی جاتی ہے کہ ہوندگند باگلکوٹ کی رہنے والی آشا کا شوہر سرکای اسپتال میں داخل تھا۔ وہ اپنی چھ سالہ بچی کے ساتھ شوہر سے ملنے اسپتال پہنچی۔ دوسری طرف اُپندا کی ایک خاتون گیتا کا شوہر بھی اسی اسپتال میں داخل تھا اور وہ بھی اپنے شوہر سے ملنے اسپتال آئی ہوئی تھی۔ اس دوران آشا کی چھ سالہ بچی جب وارڈ سے باہر کھیل رہی تھی تو مبینہ طورپر گیتا نے اسے چاکلیٹ کا لالچ دے کر اغوا کرلیا اور سیدھے اپنے گھر پہنچ گئی۔ پھر نہ جانے کیا بات ہوئی کہ اس نے گھر کے اندر بچی کی پیٹائی کردی، جس پر بچی بہت زیادہ چیخنے اور رونے لگی۔ بچی کے چیخنے پر آس پڑوس کے لوگ جمع ہوئے تو گیتا بچی کو لے کر واپس اسپتال چھوڑنے پہنچی۔ تب تک آشا اور اس کے شوہرنے اپنی بچی گُم ہوجانے کے سلسلے میں اسپتال میں سب کو بتادیا تھا اور بچی کی تلاش جاری تھی۔جب گیتا بچی کو لے اسپتال کی طرف آئی تو وہاں پر موجود عوام نے اسے دھر لیا اور بچی کو اغوا کرنے کے الزام میں پولیس کے حوالے کردیا۔ کہتے ہیں کہ اسپتال میں موجود سی سی ٹی وی کیمرے کی فوٹیج سے بھی گیتا کے ذریعے بچی کو اغوا کرنے کی بات ثابت ہوگئی ہے۔
مقامی پولیس نے بچی کو اغوا اور مار پیٹ کرنے کا معاملہ درج کرلیا ہے۔