اُڈپی 14؍اگست (ایس او نیوز)ضلع اڈپی کے بجرنگ دل اور وشواہندوپریشد کے لیڈروں نے مطالبہ کیا ہے کہ 24اگست 2015کو دئے گئے ہائی کورٹ کے فیصلے پر عمل کرتے ہوئے مویشیوں کے تحفظ کے لئے ضلع انتظامیہ فوری طور پر سات رکنی کمیٹی تشکیل دے۔

اڈپی پریس کلب میں اخباری نمائندوں سے خطاب کرتے ہوئے وی ایچ پی کے ضلع صدر ولاس نائیک نے بتایا کہ بقر عید قریب آگئی ہے اور لوگ گائے اور بیل فروخت کرنے کے لئے تیار بیٹھے ہیں۔اس لئے وی ایچ پی اور بجرنگ دل ضلع انتظامیہ سے مطالبہ کرتی ہے کہ وہ مویشیوں کے تحفظ اور ان کے ذبیحہ کو روکنے کے لئے اقدامات کرے۔

ولاس نائیک نے کہا کہ:’’ہائی کورٹ نے 24اگست 2015کوریاستی حکومت کو ہدایت دی تھی کہ تہواروں کے موقع پر بڑے پیمانے پر جانوروں کا ذبیحہ روکنے کے لئے ایک سات رکنی کمیٹی تشکیل دے۔جس کے چیرپرسن ضلع ڈپٹی کمشنر ہونگے اور ضلع پولیس سپرنٹنڈنٹ، ڈپٹی ڈائریکٹر آف اینیمل ہسبنڈری ڈپارٹمنٹ،آر ٹی اے کے افسر،ضلع پنچایت سی ای او،پولیوشن کنٹرول بورڈ کے افسر،ماہرماحولیات اور مقامی بلدی ادارے کے نمائندے اس کمیٹی میں شامل رہیں گے۔لیکن ہائی کورٹ کے اس فیصلے پر آج تک عمل در آمد نہیں ہوا ہے۔‘‘

ولاس کا کہنا تھا کہ :’’ پولیس کو غیر قانونی طورپر جانوروں کی سپلائی روکنے کے لئے ہر جگہ چیک پوسٹ قائم کرنے چاہیے۔تہوار کے موسم میں کسان اپنی گائیں فروخت کرنے کے لئے تیار رہتے ہیں۔اس لئے متعلقہ محکمہ جات کو ہائی کورٹ کے حکم پر بغیر کسی بیرونی دباؤ کے عمل کرنا چاہیے۔اگر کوئی بھی اس حکم کی خلاف ورزی کرتا ہے تو پھر توہین عدالت کا مقدمہ دائرکیا جانا چاہیے۔مسلمانوں کو بقر عید بغیر بیف کے اور بغیر کسی تشدد کے منانا چاہیے۔اگر کوئی اس اصول کی خلاف ورزی کرتا ہے تو پھر ان کے خلاف سخت قانونی اقدام کیا جاناچاہیے۔‘‘

سنیل کے آر کنوینر بجرنگ دل منگلورو ڈیویژن نے مطالبہ کیا کہ ضلع ڈپٹی کمشنر کو عوام میں گائے کی فروخت اوراسے ذبح کرنے کے خلاف بیداری لانے کے لئے ایمرجنسی میٹنگ منعقد کرنی چاہیے۔گائے اور عمر رسیدہ مویشیوں کے تحفظ کے سلسلے میں جارحانہ تشہیر ہونی چاہیے۔‘‘اس ضمن میں 17اگست کو وی ایچ پی کی طرف سے ڈپٹی کمشنر کو میمورنڈم دیا جائے گا۔

اس پریس کانفرنس کے موقع پر گؤ رکھشا یونٹ کے سیکریٹری پرمودکے علاوہ بھوانی درگا بائی ونگ کی کوآرڈینیٹر بھاگیہ شری موجود تھیں۔