اڈپی 7؍دسمبر( ایس او نیوز) منی پال کے منچی کیری نامی مقام پر سنڈیکیٹ بینک ٹریننگ سنٹر کے عقب میں واقع ایک غیر مستعمل کنویں سے انسانی ہڈیوں کا ڈھانچہ بر آمد ہوا ہے۔

کہتے ہیں کہ سرکاری آئی آئی ٹی کالج کو جانے والی سڑک پر سنڈیکیٹ بینک کا ٹریننگ سنٹر ہے۔یہاں پر ایک 90فٹ گہرا کنواں موجود ہے جسے ایک عرصے سے کوئی بھی استعمال نہیں کرتا ۔ بہت دنوں سے مقامی افراد شکایت کررہے تھے کہ کنویں سے ناقابل برداشت بدبو نکل رہی ہے۔اس شکایت کے پیش نظر سے پولیس نے تحقیقات کرنے کے لئے کنویں سے پمپ کے ذریعے پانی باہر نکالا تو کنویں کے اندر انسانی جسم گل سڑجانے کے بعدباقی بچا ہوا ہڈیوں کا ڈھانچہ پڑا تھا۔ہڈیوں کو دیکھ کر اندازہ لگایا جارہا ہے کہ اس شخص کی موت کم ازکم 2مہینے قبل ہوئی ہوگی۔حتمی رائے جاننے کے لئے ہڈیوں کومنی پال کے کے ایم سی اسپتال بھیج دیا گیا ہے جہاں اس کی فارنسک جانچ کی جائے گی۔اس سے مرنے والے کی عمر وغیرہ کا اندازہ لگایا جائے گا۔پولیس کا کہنا ہے کہ ہڈیوں کے علاوہ پینٹ اور چپل بھی کنویں سے برآمد ہوئی ہے۔اب ہڈیوں کی فارنسک جانچ رپورٹ آنے پرکنویں میں گمشدہ افراد کی فہرست سے برآمد شدہ ہڈیوں اور دیگر اشیاء کا موازنہ کرکے کنویں میں ہلاک ہونے والے شخص کی پہچان کرسکے گی۔

عوام کا کہنا ہے کہ اس کنویں کے اطراف غیر سماجی سرگرمیاں چلتی رہتی ہیں۔ اس لئے منی پال پولیس مشکوک موت کا معاملہ درج کرنے کے بعدیہ جاننے کی کوشش کررہی ہے کہ جس شخص کی ہڈیاں برآمد ہوئی ہیں، اس نے کنویں میں کود کرخودکشی تھی یا اسے کسی نے کنویں میں دھکا دے کر مار ڈالا ہے۔پولیس کو امید ہے کہ وہ اس معمے کو جلد ہی حل کرلے گی۔