اُدپی،31؍جولائی (ایس او نیوز) شیرور مٹھ کے لکشمی ورا تیرتھا سوامی کی مشکوک موت کے سلسلے میں تحقیقات کرنے والی پولیس حالانکہ ان کی پوسٹ مارٹم رپورٹ مل گئی ہے ، لیکن ڈاکٹروں نے اس رپورٹ میں موت کا قطعی سبب بتانے سے گریز کرتے ہوئے فارنسک لیباریٹری کی رپورٹ کا انتظار کرنے کی بات کہی ہے۔

کہا جاتا ہے کہ منی اسپتال میں سوامی جی کا پوسٹ مارٹم کرنے والی ڈاکٹروں کی 8رکنی ٹیم نے اپنی رپورٹ براہ راست ضلع سپرنٹنڈنٹ آف پولیس لکشمن نمبرگی کو پہنچائی ہے۔ مگر اس میں موت کا واضح سبب درج نہ کرتے ہوئے ڈاکٹروں نے کہا ہے کہ فارنسک رپورٹ ملنے کے بعددونوں رپورٹوں کو سامنے رکھ کر قطعی سبب بتایا جائے گا۔ خیال رہے کہ 19جولائی کو سوامی جی کی موت منی پال اسپتال میں ہوئی تھی اور ابتدائی یہ بات سامنے آئی تھی کہ ان کے جسم میں اندرونی خون کے بہاؤ سے موت واقع ہوئی ہے اور کچھ زہر خورانی کے علامات پائے گئے ہیں۔اس وجہ سے پوسٹ مارٹم کے ساتھ ساتھ ان کے جسم کے مختلف اعضاء کے کچھ حصے منگلورو میں واقع فارنسک لیباریٹری میں جانچ کے لئے بھیجے گئے تھے۔

ذرائع سے ملی خبروں کے مطابق فارنسک جانچ کی رپورٹ موصول ہونے میں ابھی مزید ایک مہینے کا وقت لگ سکتا ہے۔لیکن پولیس کی طرف سے رپورٹ کا انتظار کرنے کے ساتھ ساتھ اپنی تحقیقات جاری رکھے گی۔خبر یہ بھی ہے کہ سوامی جی کی قریبی اور آشنا خاتون کو دوبارہ تفتیش کے لئے پولیس نے اپنی تحویل میں لیا ہے۔