اڈپی،30؍جنوری (ایس او نیوز) غذا کی تلاش میں جنگل سے دیہات میں آنے والا ایک چیتا کھلے کنویں میں گرگیا اور پھر اوپر آنے میں ناکام ہونے پر پانی میں ڈوب کر ہلاک ہوگیا۔

موصولہ رپورٹ کے مطابق چیتے کی موت کا یہ واقعہ سُٹّو بَلّے نامی مقام پر ایک سنسان سے علاقے میں ستیش کولال نامی شخص کی ملکیت والے احاطے میں پیش آیا۔ کہتے ہیں کہ اس علاقے میں آبادی بھی نہیں ہے اور لوگوں کی آمد ورفت بھی بہت کم ہے، اس لئے دو دن تک چیتا کنویں میں مردہ پڑا رہا اور کسی کو خبر نہیں ہوئی۔ جب ستیش کمار کے گھر والے اس کنویں سے پانی لینے پہنچے تو کنویں کے اندر چیتے کی لاش تیرتی ہوئی نظر آئی۔ 

گاؤں والوں کی طرف سے خبر ملنے پرمحکمہ جنگلات کے افسران نے موقع پر پہنچ کر گاؤں والوں کی مدد سے چیتے کی لاش باہر نکالی۔ جانوروں کے ڈاکٹر نے پوسٹ مارٹم کیا اور پھر گاؤں والوں کی مدد سے ہی محکمہ جنگلات کے افسران نے قریبی جھاڑیوں میں چیتے کی لاش کو دفن کردیا۔