اڈپی: جنسی تعلقات کے لئے خاتون کوہراساں کرنے پر کنڑا رکھشنا ویدیکے لیڈر گرفتار
اڈپی 15؍جولائی (ایس او نیوز) اڈپی تعلقہ میں شیروا کے قریب پنجیمار علاقے میں ایک خاتون کو جنسی تعلقات کے لئے ہراساں کرنے پر کنڑا رکھشنا ویدیکے کے اعزازی صدر کو پولیس نے گرفتار کرلیا ہے۔
موصولہ رپورٹ کے مطابق درج فہرست ذات سے تعلق رکھنے والی متاثرہ خاتون پنجیمار میں ایک فینسی اسٹورچلاتی ہے۔ کنڑا رکھشنا ویدیکے کے سابق ڈسٹرکٹ صدر اور موجودہ اعزازی صدرسنتوش شیٹی پنجیمار نے مبینہ طور پر اس خاتون کو فون پر فحش پیغامات بھیجنا شروع کیا اور اس کے ساتھ لاڈج میں چل کر وقت گزاری کے لئے اصرار کرنے لگا۔سنتوش شیٹی کے اس رویے سے پریشان ہوکر اس خاتون نے اپنے شوہر کو ساری بات بتائی اور سنتوش کو رنگے ہاتھوں گھرنے کا منصوبہ بنایا۔جس کے تحت خاتون نے سنتوش کا فون دوبارہ آنے پر اسے بتایا کہ وہ اس کے ساتھ ہوٹل روم میں چلنے کے لئے تیار ہے اس لئے وہ دکان پر آکر اسے اپنے ساتھ لے جائے۔ سنتوش اس دھوکے میں آگیا اور روم بک کرکے جب خاتون کو لینے اس کی دکان پر پہنچا تو وہاں اس خاتون کا شوہر موجود تھا جس کے سامنے خاتون نے سنتوش کی پیٹائی کردی۔ اور اس کے بعد اسے پولیس کے حوالے کردیا۔
کاپ سرکل پولیس انسپکٹر ہالامورتی راؤ نے بتایا کہ سنتوش شیٹی کے خلاف درج فہرست ذات پر مظالم کی روک تھام قانون کے تحت کیس درج کرلیا ہے اور ڈی وائی ایس پی کے ذریعے اس معاملے کی تحقیقات کی جارہی ہے۔