اُڈپی:24/جولائی (ایس اؤنیوز)محکمہ جنگلات کی طرف سے جنگلات کی بقا کو ترجیح دیتے ہوئے اُڈپی ضلع میں 3،500افراد سمیت پوری ریاست میں 60،000غریب عوام میں پکوان گیس (گیس +چولہا)تقسیم کئے جانےکی جانکاری ریاستی وزیر برائے جنگلات رماناتھ رائی نے دی۔
کرناٹکا فاریسٹ محکمہ کنداپور زون، ضلع قانونی خدمات بورڈ اُڈپی، کرناٹکا انسدا د آلودگی بورڈ اور منگلورو یونیورسٹی کے شعبہ این ایس ایس کے زیراہتمام مشترکہ طورپر ’’پانی کے لئے جنگلات-2017‘‘مہم کے پیش نظر منعقدہ پروگرام کا افتتاح کرنےکے بعد وہ خطاب کررہے تھے۔ ریاست میں ہرسال ہونے والی خشک سالی اور قحط کو دیکھتے ہوئے آبی ذخیروں کی تلاش کرتے ہوئے جنگلات کے پھیلاؤ اور بقا کی خاطر یہ مہم جاری کرنے کی وزیر نے جانکاری دی ۔ ہماری مہم کا سلوگن ’’پودا نصب کرو، پودا پرورش کرو، پودوں کی حفاظت کر کے گناہ سے نجات پاؤ‘‘ ہے۔ کسانوں کے تعاون سے شجرکاری کو فروغ دینے کے لئے ’’فاریسٹ زرعی ترغیب ‘‘ نامی پروگرام جاری کیا گیا ہے۔ اپنی جگہ پر پودوں کی نصب کاری کرکے پرورش کرنے والے کسان کو پہلے سال 30روپئے، دوسرے سال 30روپئے، تیسرے سال 40روپئے (ایک درخت کی پرورش پر کل 100روپئے )اداکرنے والے اس منصوبے کے نفاذ میں ہرایک کسان شریک ہوسکتاہے۔ اسی طرح بچوں کے لئے بھی الگ سے پروگرام ترتیب دئیے گئے ہیں۔ اس موقع پر وزیر پانی کے لئے جنگلات پرایک کتابچہ کا اجراء کرنے کے بعد ضلع نگراں کار وزیر پرمود مدھواراج نے خطاب کیا۔ پروگرام میں بلدیہ صدر میناکشی مادھو بننجے ، تعلقہ پنچایت صدر نلنی پردیپ راؤ، منی پال یونیورسٹی کے ڈاکٹر کے جی پربھو، اپر چیف فاریسٹ آفیسر پوناٹی شری دھر، منگلوروزون ڈی ایف اؤ کلیکالن ، ڈی سی پریانکا میری فرانسس، اپر ڈی سی انورادھا، سنئیر سول جج لتا ڈائس پر موجود تھے۔