اُڈپی :18/ستمبر(ایس اؤ نیوز) نریندر مودی کی قیادت والی مرکزی بی جے پی کی  حکومت 41ہزار کروڑ روپیوں کے رافیل جنگی جہاز گھپلے کے متعلق شفاف جانچ کا مطالبہ کرتے ہوئے اُڈپی ضلع کانگریس کی قیادت میں منگل کو اُڈپی ڈپٹی کمشنر دفتر کے روبرو احتجاج کیا گیا۔

منی پال ٹائیگر سرکل سے ڈی سی دفتر تک احتجاجی ریلی کا اہتمام کرتے ہوئے وزیر اعظم نریندر مودی کے خلاف نعرے بازی کی گئی ۔ ریلی  میں قریب 200کارکنوں نے ہاتھوں  میں لاٹھیوں کی نمائش کرتے ہوئے اپنی برہمی کا اظہار کیا۔ ریلی میں ہزاروں کانگریسی کارکنان ، لیڈران نے شرکت کی۔

ڈی سی دفتر کے روبرو منعقدہ احتجاجی اجلاس سے خطاب کرتے ہوئے سابق وزیر ونئے کمار سورکے  نے مرکزی حکومت پر الزام لگایا کہ رافیل جنگی جہازوں کے گھپلے کی وجہ سے ملک کو 41ہزارکروڑ روپیوں کانقصان ہواہے۔ یہ اس صدی کا سب سے بڑا گھپلہ ہے۔ اس گھپلے میں وزیرا عظم نریندر مودی راست شامل ہونے  کی وجہ سے تمام پارٹیو ں پر مشتمل جوائنٹ پارلیمنٹری کمیٹی سے جانچ کرانے پر زور دیا۔ سابق رکن اسمبلی گوپال بھنڈاری نے کہاکہ آپسی بے اعتمادی ، پیچیدگیوں سے ملک میں اتحاد کا ہونا ناممکن ہے۔ ہم سب سکیولرزم ،بھائی چارگی اور خیرسگالی کے ساتھ متحدہ طورپر زندگی گزارنی ہے۔ لیکن بی جے پی والے دھرم کے نام پر تقسیم کرکے ، آپس میں بے اعتمادی پیدا کرکے ، عوام کے جذبات کو مشتعل کرکے اقتدار حاصل کیا ہے۔ جس کے نتیجے میں ملک کے حالات اس حد تک پہنچے ہیں۔ ضلع کانگریس صدر جناردھن تونسے، ودھان پریشد کے رکن کے پرتاپ چندر شٹی ، سابق رکن اسمبلی گوپال پجاری، انٹک کے ریاستی صدر راکیش ملی، کے پی سی سی کے جنرل سکریٹری جی اے باوا، ایم اے غفور، لیڈران ممتاگٹی، دیوی پرساد شٹی ، ورونیکا کرنیلی ، راجو پجاری، امرت شنئی، نوین چندر شٹی وغیرہ موجود تھے۔ اس کے بعد اس سلسلے میں اپر ڈی سی ودییاکماری کی معرفت ڈی سی کو میمورنڈم سونپا گیا۔