"چلو اُڈپی جاتھا " کے فولڈر کا اجراء ؛ غذائی حق کے تحفظ کے لئے 4 اکتوبر سے 9 اکتوبر تک کرناٹکا میں منائی جائے گی مہم
اُڈپی :26/ستمبر (ایس او نیوز) ’’گائے میں کروڑوں دیوتاہیں ‘‘ اس طرح کے جھوٹے بیانات اور مقولوں کو عام کرکے اپنے مفاد کے لئے عوام کے غذائی حق پر مسلسل زور زبردستی اورظلم اس قدر بڑھ گیا ہے کہ اس کے نام پر انسانوں کا قتل تک کیا جارہا ہے۔ ظالمانہ سوچ اب اس حد تک پہنچ گئی ہے کہ انسانوں کی جان سے زیادہ گائے کی زندگی عزیز ہوگئی ہے۔ یہ دیکھتے ہوئے ہمیں اب ہمیں اپنے غذائی حق کا تحفظ کرنا لازمی ہوگیا ہے۔ ان خیالات کا اظہار مظلوم دلت سوابھیمانی جدوجہد کمیٹی کے کنوینر بھاسکر پرساد نے کیا۔
کمیٹی کی قیادت میں 4اکتوبر سے 9اکتوبر تک منائی جارہی مہم ’’ چلو اُڈپی۔ غذا ہمارا حق ، زمین ہمارا حق ‘‘ موضوع پر سوابھیمانی سنگھرش جاتھا کی طرف سے آدی اُڈپی کے امبیڈکر بھون میں جاتھا کے متعلق فولڈرکا اجراء کرنے کے بعد وہ خطاب کررہے تھے۔ اپنی بات جاری رکھتے ہوئے موصوف نے کہاکہ غذاکاانتخاب اور زمین کے حق کے لئے یہ ’’چلو اُڈپی ‘‘ کے نام سے جدوجہد جاری ہے ، اور فی الحال جس نہج پر اس مہم کی تیاریاں جاری ہے اس کو دیکھیں تو کہا جاسکتاہے کہ یہ جدوجہد کرناٹکا کی تاریخ میں اپنا ایک باب رقم کرے گا ۔ متعلقہ جدوجہد میں ریاست کے 200سے زیادہ ترقی پسند ، روشن خیال ادارے ، تنظیمیں شامل ہیں۔ جاتھا 4اکتوبر کو بنگلورو سے شروع ہوگا اور 9اکتوبر کو اُڈپی میں اختتام کو پہنچے گا۔ اس دن اُڈپی کیاہم سڑکوں پر ریلی گزرے گی ، بیڈنگوڈے کے مہاتماگاندھی رنگ مندر میں بڑے اجلاس کا انعقاد ہوگا۔ گجرات کے اونا میں دلتوں کے بڑے اجلا س کی قیادت کرنے والے یوتھ لیڈر جگنیش میوانی اجلاس میں شرکت کریں گے،20سے 25ہزار تک عوام کے شریک ہونے کی توقع ہے۔ متعلقہ جدوجہد تین مرحلو ں پر ہوگی۔ پہلا مرحلہ چلو اُڈپی ۔ دوسرے مرحلے میں 30اضلاع میں اجلاس کاانعقاد اور پریس کانفرنس کی جائے گی۔ تیسرے مرحلے میں حکومت کو چوکنا اور انتباہ دینے کے لئے بنگلورو میں ایک بڑے اجلاس کا اہتمام کیا جائے گا۔
کرناٹکا کوموسوہاردا ویدیکے کے جنرل سکریٹری کے ایل اشوک نے خطاب کرتے ہوئے کہاکہ چلو اُڈپی اس دہے کی نئی جدوجہد ہے۔ نئی نسل اور نوجوان اس جدوجہد میں بڑے جوش و خروش کے ساتھ شامل ہورہے ہیں، دلت، بائیں بازو کی تنظیمیں اور ادارے ، ریاست کے بزرگ ادیب، محررحضرات اور فن کاروغیرہ اس جدوجہد میں شامل ہوں گے ۔ اس موقع پر ویدیکے کے ضلعی صدر جی ، راج شیکھر، پروفیسر فنی راج ، دینکر بینگرے ، دلت سنگھرش کمیٹی کے شیام راج بھرتی، سندرماسٹر، شیام سندر کپیٹو، ضلع اقلیتی ویدیکے کے خلیل احإد، خطیب عبدالرشید ، صلاح الدین، حسین کوڑی بینگرے، کنک داس سیوا سمیتی کے ہنومنتپا ، راگھو موگویر ، بال کرشنا وغیرہ موجود تھے۔
:SahilOnline Coastal news bulletin in URDU dated 26 September 2016