اڈپی: حادثاتی طور پرچلتی کار میں لگی آگ۔ معجزاتی طور پر بچ گئے مسافر !
اڈپی 9؍ستمبر (ایس او نیوز) چلتی کار میں اچانک آگنے اور بھڑکتے شعلوں کے درمیان مسافروں کے بال بال بچ نکلنے کا حادثہ جوڈو کٹّے کے قریب پیش آیا ہے۔ بتایاجاتا ہے کہ ماروتی 800کار ایک دیگر مسافر کے ساتھ خاتون چلا رہی تھیں ۔جب ڈرائیو کررہی خاتون نے کار کے اگلے حصے سے آگ کے شعلے نکلتے دیکھے تو اس نے سڑک پر ہی کار کھڑی کردی اور عجلت کے ساتھ دونوں کار سے باہر نکل آئے۔ پھر چند منٹوں کے اندر پوری کار آگ شعلوں میں بدل گئی۔
اتفاق سے اس موقع پر جو لوگ سڑک سے گزر رہے تھے انہوں نے بیچ سڑک پر جلتی ہوئی کار کے منظر کو اپنے موبائل میں قید کرنے میں زیادہ دلچسپی دکھائی اور کسی نے بھی فائر بریگیڈ کو اطلاع دینے کی زحمت نہیں کی۔فائر اسٹیشن حادثے کے مقام سے تقریباً نصف کلو میٹر کی دوری پر تھا۔ ایک نوجوان نے خود وہاں پہنچ کر عملے کو اس بات کی اطلاع دی۔ مگر جب تک فائر بریگیڈ کا عملہ موقع پر پہنچتا، کار پوری طرح جل کر خاکستر ہوگئی تھی۔
ٹاؤن پولیس اسٹیشن کے افسران نے جائے حادثہ پر پہنچ کر معائنہ کیا اور معاملہ درج کرلیا۔