بھاسکر شٹی قتل معاملہ : ثبوت مٹائے کے الزام میں دو ملزمان سی آئی ڈی کی تحویل میں
اُڈپی:24/اگست(ایس او نیوز)صنعت کار بھاسکر شٹی قتل معاملے کے ملزموں کو عدالت میں پیش کیا گیا ، کلیدی ملزم نونیت شٹی اور نرنجن بھٹ کو 6ستمبر تک عدالتی تحویل میں بھیج دیا گیا ہے، معاملے کے سلسلے میں ثبوتوں کو مٹانے کے الزام کا سامنا کررہے ملزم نرنجن بھٹ کے والد شری نواس بھٹ اور کارڈرائیور راگھویندر کو عدالت نے 29اگست تک سی آئی ڈی کی تحویل میں دیا ہے۔
منگلورو جیل میں قید اور ایک ملزم راجیشوری شٹی کو قتل معاملے کے سلسلے میں منگلورو سے اُڈپی لایا گیا تھا، جنہیں عدالت میں پیش کرنا باقی ہے۔چونکہ آج معاملے کے ملزمین کی عدالتی تحویل کی مدت ختم ہوگئی تھی جس کی بنا پر انہیں عدالت میں پیش کیا گیا تھا۔
اب یہ معاملے سی آئی ڈی کے حوالے کئے گئے ہیں، سی آئی ڈی افسران نے ابھی تک ملزموں سے پوچھ تاچھ نہیں کی ہے، یہی وجہ ہے کہ سی آئی ڈی افسران نے عدالت میں عرضی داخل کرتے ہوئے درخواست کی تھی کہ ملزموں کو ہمارے حوالے کیا جائے، عرضی پر سنوائی کرتے ہوئے عدالت نے ثبوت مٹانے کے الزام کا سامنا کررہے شری نواس بھٹ اور راگھویندر کو سی آئی ڈی کے حوالے کیاگیا۔
ہرزاویہ سے قتل معاملے کی جانچ ہوگی :سی آئی ڈی:بھاسکر شٹی قتل معاملے کو حکومت نے سی آئی ڈی کے حوالے کرنے کے بعد سی آئی ڈی کے اے ڈی جی پی پرتاپ ریڈی نے اُڈپی ایس پی دفتر میں پریس کانفرنس کے ذریعے گفتگو کرتے ہوئے بتایا کہ قتل معاملے کی جانچ کے سلسلے میں ہم ہرزاویہ سے کام کررہے ہیں، معاملے کے ہرمرحلے کی ہم بہت ہی باریکی سے تفتیش کررہے ہیں۔ ہماری جانچ ٹیم اُڈپی میں ٹھکانہ ڈالے ہوئےہے، جس میں 8سے 10افسران جانچ کی ذمہ داری سنبھالے ہوئے ہیں، جو ہر ایک نکتہ کی بڑی باریکی سے جانچ کریں گے۔ انہوں نے بتایا کہ وقت کی ضرورت کے مطابق ملزموں کو اپنی تحویل میں لیں گے ، عدالت میں منظوری لے کر تمام ملزموں سے پوچھ تاچھ کریں گے۔ مقامی پولس کی شروعاتی جانچ میں ہوئی خامیوں کے متعلق پوچھے گئے سوال پر انہوں نے بتایا کہ اس تعلق سے ابھی کچھ کہنا ٹھیک نہیں ہے، ہر ایک قدم کی جانچ کے بعد مطلع صاف ہونے کی بات کہی۔