اڈپی 24؍اگست (ایس او نیوز)قومی سطح پر چینی اشیاء کا بائیکاٹ کروانے کے لئے اڈپی بجرنگ دل کی طرف سے یکم ستمبر سے احتجاجی مہم کا آغاز کیا جائے گا۔اس بات کا اعلان ایک پریس کانفرنس کے دوران بجرنگ دل کے کنوینر شرن پمپ ویل نے کیا۔

شرن کا کہنا تھا کہ" ملک کے بازار میں بہت بڑے پیمانے اورسستی قیمتوں پرچینی اشیاء فروخت ہورہی ہیں۔ اس سے ہماری گھریلو اور چھوٹے پیمانے کی صنعتوں کو کافی نقصان پہنچا ہے۔ پٹاخہ سازی، سلک، کپڑے اور کھلونے کی صنعت چینی اشیاء کی وجہ سے سب سے زیادہ متاثر ہوئی ہیں۔لاکھوں دستکار اور مزدور بے روزگاری کی وجہ سے سڑک پر آگئے ہیں۔"

شرن پمپ ویل نے کہا "کہ اب چین ہندوستانی سرحد پر دخل اندازی کرتے ہوئے ہماری فوج کے لئے مسائل کھڑے کر رہا ہے۔مبینہ طور پر چین ہمارے ملک میں اندرونی جنگ چھیڑنے کے لئے ترقی یافتہ ٹیکنالوجی کے ذریعے دہشت گردوں کوبھی تربیت دے رہا ہے۔جس کا مقصد ہندوستان کی اندرونی اور بیرونی سیکیوریٹی کو بگاڑنا ہے۔وہ لوگ پاکستانی فوج کو طاقتور ہتھیار بھی سپلائی کررہے ہیں۔اسی لئے ہم پٹاخے، کھلونے، کپڑے اور موبائل جیسی تمام چینی اشیاء کا بائیکاٹ کرنے اور یہاں کے عوام کو سودیشی چیزیں خریدنے کی مانگ کرتے ہوئے احتجاجی مہم کا آغاز کررہے ہیں۔"

اس موقع پر شرن پمپ ویل نے اپنے پرانے ایجنڈے' لوجہاد 'پر بھی بولتے ہوئے کہا کہ یہ ہندو سوسائٹی کو ختم کرنے کی ایک منظم سازش ہے۔اور ہندو لڑکیاں لوجہاد کا شکار ہوتی جارہی ہیں۔یہ معاملات ساحلی علاقے میں بڑھتے جارہے ہیں اور یہ دہشت کا گردی ایک دوسرا چہرہ ہے۔