دبئی اورسعودی سمیت دنیا کے کئی ملکوں میں پورے مذہبی جذبے کے ساتھ منائی گئی عید؛کروڑوں مسلمانوں نے ادا کی عید کی دوگانہ
دبئی یکم ستمبر (ایس او نیوز/ایجنسی) متحدہ عرب امارات اور سعودی عرب سمیت دیگر خلیجی ریاستوں کے ساتھ ساتھ امریکہ، آسٹریلیا اور دنیا کے دیگر ممالک میں مسلمانوں نے آج جمعہ کوعیدالاضحیٰ کی نماز ادا کی۔ جس کے بعدفرزندانِ توحید نے سنت ابراہیمی کی پیروی کرتے ہوئے اللہ کی راہ میں جانوروں کی قربانی پیش کی۔
چار روز تک چلنے والی اس عید کو سعودی عرب اور دیگر خلیجی ممالک سمیت افریقہ، امریکا، یورپ، آسٹریلیا اورمشرق بعید کی مختلف ریاستوں میں آباد کروڑوں مسلمان پورے مذہبی جوش و جذبے کے ساتھ منارہے ہیں۔ اور سنت ابراہیمی پرعمل کرتے ہوئے اللہ کی رضا اورخوشنودی کے لیے جانوروں کی قربانی دے رہے ہیں۔ قربانی کی ادائیگی کے بعد مسلمان اپنی اپنی مقامی روایات کے مطابق عید کی خوشیاں دوبالا کرنے کے لیے مختلف تقاریب کا اہتمام کررہے ہیں۔
سعودی عرب میں نماز عید کے سب سے بڑے اجتماعات مسجد الحرام اور مسجد نبوی میں ہوئے جس کے بعد مسلمانوں نے سنت ابراہیمی پر عمل کرتے ہوئے اللہ کی رضا کے لئے جانوروں کی قربانی کی۔ خانہ کعبہ میں عیدالاضحیٰ کی نماز شیخ ڈاکٹر سعود الشریم نے پڑھائی جس میں لاکھوں فرزندان توحید نے شرکت کی۔ عربی میں خطبہ پیش کرتے ہوئے شیخ شریم نے قربانی کی اہمیت پر روشنی ڈالی اور مسلمانوں کو اللہ کے رسول حضرت محمد ﷺ کے اسوہ حسنہ پر عمل کرنے کی ہدایت کی۔
متحدہ عرب امارات، بحرین، کویت اور قطر میں شہریوں نے نماز عید ادا کی، عراق، لبنان، شام، مصر ، افغانستان، ملائشیا اور انڈونیشیا میں بھی آج سےعید قربان منائی جا رہی ہے۔ امریکا برطانیہ ، نیوزی لینڈ، کینیڈا سمیت مختلف ممالک میں مسلمان عید کی خوشیاں سمیٹ رہےہیں۔ کینیڈا کے وزیراعظم جسٹن ٹروڈو نے مسلمانوں کو عید پر مبارکبادی کا پیغام بھی پیش کیا ہے۔روس کے دارالحکومت ماسکو میں بھی جمعہ کی صبح عید کی نماز ادا کی گئی اور ماسکو کی مرکزی مسجد میں ہزاروں لوگ جمع ہوئے۔
متحدہ عرب امارات میں سب سے بڑا اجتماع ابوظہبی کی شیخ زائید مسجد میں ہوا، جہاں نماز عید کے بعد توپ کے دو گولے ڈاغ کر عیدقرباں کی سلامی دی گئی۔دبئی میں بھی ہزاروں مسلمانوں نے مختلف عیدگاہوں میں پہنچ کر عید کی دوگانہ ادا کی۔ مقبوضہ بیت المقدس میں بھی عیدالاضحیٰ روایتی جوش و جذبے کے ساتھ منائی گئی اور مسجد الاقصیٰ میں عید کا سب سے بڑا اجتماع ہوا۔
مکہ میں حجاج کرام نے مزدلفہ میں دعاؤں میں مصروف رہنے کے کچھ دیر بعد بڑے شیطان کو کنکریاں مارنے کا عمل شروع کیا جس کے بعد جانوروں کی قربانی دی گئی ، بتایا گیا ہے کہ اس کے بعد سرمنڈوا کر احرام کھول دیا۔
خیال رہے کہ آج جمعہ سے ہندوستان کے ساحلی کرناٹکا اور کیرالہ میں بھی عیدالاضحیٰ منائی جارہی ہے، البتہ ملک کے دیگر شہروں اور ریاستوں میں کل سنیچر سے عید الاضحیٰ منائی جائے گی۔پاکستان اور بنگلہ دیش میں بھی کل سنیچر سے عید الاضحیٰ منائی جائے گی۔