کنداپور19؍اپریل(ایس او نیوز) یہاں جالاڈی کے قریب شاہراہ پر بڑے بھاری قسم کے ٹرک کے دونوں ٹائر دھماکے کے ساتھ پھٹ گئے جس کی وجہ سے مسلسل دو گھنٹوں تک ہائی وے پر ٹریفک میں خلل واقع ہوا۔
موصولہ رپورٹ کے مطابق یہ واقعہ جالاڈی اور ہالاڈی کے بیچ واقع پل پر منگلورو سے ہبلی کی طرف جانے والے ٹرک کے ساتھ پیش آیا۔خیال رہے کہ یہاں نیشنل ہائی وے کی توسیع کا کام بڑی سست رفتاری سے چل رہا ہے۔ پرانی سڑک سے تارکول نکالنے کے لئے ٹریفک کا راستہ بدل دیا گیا ہے۔اسی تبدیل شدہ راستے پر ٹرک کے ٹائر بیچ سڑک پر پھٹ جانے سے گاڑیوں کی آمد روفت میں بڑی رکاوٹ کھڑی ہوگئی۔اس مشکل پر قابو پانے میں کنداپور ٹریفک پولیس کے پسینے چھوٹ گئے۔کافی جدوجہد کے بعد ٹریفک جام میں پھنسی گاڑیوں کو راحت ملی۔