جموں وکشمیر:پلوامہ میں فوج کا 2علاقائی دہشت گردوں کومارگرانے کادعویٰ
سرینگر،10؍ نومبر (ایس او نیوز؍آئی این ایس انڈیا)جموں و کشمیر میں فوج نے دو دہشت گردوں کو ایک تصادم میں ہلاک کر نے کادعوی کیا۔جنوبی کشمیر کے پلوامہ ضلع میں فوج اوردہشت گردی کے درمیان فائرنگ ہوئی۔فوج کے ذرائع کے مطابق تکین گاؤں میں ہوئے اس تصادم میں دو دہشت گردمارے گئے۔رپورٹ کے مطابق ہفتہ کی صبح سیکیورٹی فورسز کوخفیہ خبر ملی کہ کچھ دہشت گردتکین علاقے میں چھپے ہیں۔فوری طور پر نیشنل رائفلز اور سی آر پی ایف اور خصوصی آپریشن گروپ موقع پرپہنچ گیا۔سیکورٹی فورسز کو دیکھ کر دہشت گردوں کی طرف سے فائرنگ شروع ہوگئی،جوابی حملے میں دونوں عسکریت پسند مارے گئے۔دونوں دہشت گردوں کی شناخت بھی کرلی گئی ہے۔فوج کے مطابق ایک شخص کا نام لیاقت احمد ہے، جبکہ دوسرے کانام واجد ہے،لیاقت احمد پلوامہ کے نچلے علاقے کا رہنے والا تھا، دوسرا دہشت گرد واجد بھی پلوامہ کا ہی رہنے والا ہے۔سیکیورٹی فورسز نے احتیاطا پلوامہ ضلع میں انٹرنیٹ سروس پر پابندی عائد کردی ہے۔سیکورٹی فورسز نے دہشت گردں کے پاس سے ایک انساس رائفل اور ایک ازالٹ رائفل بھی برآمدکیا ہے۔