بیلتھنگڈی26؍جون (ایس او نیوز)بیلتھنگڈی پولیس اسٹیشن کی حدود میں کچھ لوگوں کے ذریعے چھرا گھونپنے کی وجہ سے دونوجوان زخمی ہوگئے ہیں جن میں سے ایک ریت کا بیوپاری ہے۔

موصولہ رپورٹ کے مطابقاس حملے میں شدید زخمی ہونے والے ریت کے بیوپاری کا نام محمد عرفان(۲۸سال) ہے ، جبکہ اس کا دوسرے ساتھی کا نام نثار (۲۵سال)بتایا جاتا ہے۔جن کو علاج کے لئے منگلورو کے اسپتال میں انتہائی نگہداشت کے وارڈ میں داخل کیا گیا ہے۔یہ دونوں رشتے میں ماموں زاد اور پھوپی زاد بھائی ہیں۔کہاجاتا ہے کہ عرفان کی شادی جولائی میں طے ہے اس سلسلے میں وہ لوگ دعوت دینے کے لئے لڑکی کے گھر گئے ہوئے تھے۔اس وقت عرفان کو کسی کا فون آیا کہ انہیں ریت کی ضرورت ہے۔ جب نثار کے رکشہ میں وہ لوگ واپس لوٹ رہے تھے تو راستے میں ریت کے لئے فون کرنے والوں سے ان کی ملاقات ہوگئی ۔ پھر کچھ دور جانے پرچندلوگوں نے سڑک پر راستہ روک کر چاقو سے ان پر حملہ کیا اور موقع سے فرار ہوگئے۔

پولیس کا کہنا ہے کہ ابھی زخمیوں کا علاج چل رہاہے ، جب ان کی طبیعت کچھ سنبھل جائے گی تو ان کاتفصیلی بیان لیا جائے گا۔بظاہر یہ واقعہ ذاتی دشمنی کا نتیجہ معلوم ہوتاہے۔