برسلز 30مئی ( ایس او نیوز؍آئی این ایس انڈیا ) بلجیم کے شہر لیڑ میں فائرنگ کے واقعے میں کم از کم 4 افراد ہلاک ہو گئے جن میں دو پولیس افسران اور ایک حملہ آور شامل ہے۔بلجیم ریڈیو اور ٹیلی وژن کی فرانسیسی زبان کی ویب سائٹ نے منگل کے روز بتایا کہ ملک کے مشرقی شہر لیڑ کے وسطی حصّے میں ایک شخص نے فائرنگ کر کے دو پولیس اہل کاروں کو ہلاک کر دیا۔ مذکورہ شخص نے ایک عورت کو یرغمال بھی بنا لیا تھا۔ بعد ازاں یہ حملہ آور بھی فائرنگ کا نشانہ بن کر اپنی جان سے ہاتھ دھو بیٹھا۔حملہ آور نے ایک کیفے کے نزدیک پولیس اہل کاروں پر فائرنگ کی اور پھر فرار ہو کر ایک اسکول میں پناہ لے لی۔ اس دوران اس نے اسکول کی صفائی کرنے والی ایک خاتون کو یرغمال بنا لیا البتہ بعد ازاں پولیس حملہ آور کو ہلاک کرنے میں کامیاب ہو گئی۔ نمائندے کے مطابق بلجیم کی پولیس نے مقامی وقت کے مطابق صبح ساڑھے دس بجے حملہ آور کی فائرنگ سے سکیورٹی فورسز کے دو اہل کاروں کی ہلاکت کی تصدیق کی ہے۔موصولہ معلومات میں اس امکان کا اظہار کیا گیا ہے کہ فائرنگ کی زد میں آ کر ایک شہری بھی اپنی جان سے ہاتھ دھو بیٹھا جو اس وقت اپنی گاڑی میں سوار تھا۔لیڑ شہر اپنے صنعتی زونز کے حوالے سے مشہور ہے۔ گزشتہ دہائیوں میں یہاں واقع صنعتی کمپنیوں کے دیوالیہ ہونے سے شہر کو بڑا دھچکا لگا۔لیڑ کا شمار ان شہروں میں ہوتا ہے جہاں جرائم پیشہ تنظیمیں اور ہتھیاروں کی اسمگلنگ سرگرم ہے۔